भीमाशंकर, ता. १९ : तळेघर (ता. आंबेगाव) येथील जिल्हा परिषद प्राथमिक शाळेत राजपूर केंद्रातील तळेघर, फलोदे, कोंढवळ, गवांदेवाडी, निगडाळे, म्हतारबाचीवाडी, राजपूर, पालखेवाडी, सावरली या नऊ शाळांचा शाळापूर्व तयारी मेळावा पार पडला. मेळाव्यात या शाळांमधील दाखलपात्र चाळीस विद्यार्थी सहभागी झाले होते. मेळाव्याचे उद्‍घाटन राजपूर केंद्राचे केंद्रप्रमुख चिमा रामा बेंढारी यांच्या हस्ते सरस्वती पूजनाने झाले. यावेळी अंगणवाडीतून इयत्ता पहिलीत येणाऱ्या बालकांचे स्वागत चॉकलेट व गुलाबाची फुले देऊन केले.
यावेळी मुलांची नावनोंदणी करून प्रत्येकाचा शारीरिक, बौद्धिक, सामाजिक, भावनिक व भाषा विकास, गणनपूर्व तयारीबाबत प्रात्याक्षिकांद्वारे क्षमतांची चाचपणी केली. पालकांची शाळापूर्व तयारीमध्ये भूमिका काय आहे, यावर पालकांना मार्गदर्शन केले. विद्यार्थ्यांना विकासपत्रक तसेच कृतीपुस्तिका दिली.
याप्रसंगी मुख्याध्यापक गोविंद उतळे, मनोहर केंगले, उषा गवारी, शोभा जाधव, नयना चौधरी, तुकाराम डामसे, वामन गभाले, विविध शाळांचे शाळा व्यवस्थापन समितीचे अध्यक्ष, महिला व विद्यार्थी उपस्थित होते.
मेळाव्याचे संयोजन शिक्षक किरणराज शेंगाळे, संतोष थोरात, अनिल वालकोळी, मनोहर थोरात, काळूराम भांगरे, संतोष भवारी, पांडुरंग भवारी यांनी केले. प्रास्ताविक व आभार नयना चौधरी यांनी आभार मानले.