भीमाशंकर, ता. २५ : बारा ज्योतिर्लिंगांपैकी एक म्हणून ओळखल्या जाणाऱ्या श्री क्षेत्र भीमाशंकर येथे आज (ता. २५) श्रावण महिन्याच्या पहिल्या दिवशी शिवभक्तांनी गर्दी केली होती. परिसरात पाऊस पडत असतानाही भाविकांनी रेनकोट परिधान करत रांगेत उभे राहून महादेवाचे दर्शन घेतले. ‘हर हर महादेव’, ‘भीमाशंकर महाराज की जय’, ‘जय भोलेनाथ’च्या जयघोषाने मंदिर परिसर दुमदुमून गेला होता. मंदिर आणि गाभाऱ्यात फुलांची सजावट, विद्युत रोषणाई करण्यात आली होती. भाविकांनी परिसर फुलून गेला होता.
वनविभागाने भीमाशंकर अभयारण्य १ मधील भीमाशंकर व आहुपे येथील १४ वनपाल, २ वनरक्षकांची भीमाशंकर परिसरातील चेक पोस्ट नाका, फिरते पथक, कचरा व्यवस्थापन, सर्व पर्यटन स्थळांवर नियुक्त केल्याचे वनपरीक्षेत्र अधिकारी रणजित जाधव यांनी सांगितले.
भीमाशंकर परिसरात हॉटेल्स व स्टॉल्स येथे आरोग्य विभागामार्फत खाद्यपदार्थ आणि स्वच्छतेबाबत सूचना देण्यात आल्या असून वैद्यकीय अधिकारी, आरोग्य सेविका, भरारी पथक अधिकारी, आरोग्य सहाय्यक यांची टीम कार्यरत आहे. भाविकांच्या अत्यावश्यक सुविधेसाठी आरोग्य पथके तसेच दोन रुग्णवाहिका कार्यरत असल्याचे तालुका आरोग्य अधिकारी तुषार पवार यांनी सांगितले. श्रावण यात्रेनिमित्ताने देवस्थान ट्रस्ट व पोलिस प्रशासन यांच्यासह इतर विभागांनी विशेष व्यवस्था केली होती.