भीमाशंकर, ता. ११ : बारा ज्योतिर्लिंगांपैकी सहावे ज्योतिर्लिंग भीमाशंकर येथे श्रावण महिन्यातील तिसऱ्या सोमवारी (ता. ११) पहाटे ५ वाजता देवस्थान ट्रस्टच्या वतीने शिवलिंगावर दुग्धाभिषेक, विधिवत पूजा, शंखनाद, महाआरती करण्यात आला. त्यानंतर मंदिर भाविकांना दर्शनासाठी खुले करण्यात आले. भाविकांनी शिवलिंगाचे दर्शन घेण्यासाठी गर्दी केली होती.
शिवभक्तांनी दर्शनासाठी मध्यरात्री पासूनच गर्दी केली होती. मंदिर परिसर आणि गाभाऱ्यात फुलांची सजावट, विद्युत रोषणाई करण्यात आली होती. ‘हर हर महादेव,’ ‘भीमाशंकर महाराज की जय,’ ‘जय भोलानाथ’च्या जयघोषाने परिसर दुमदुमून गेला होता.
भाविकांना दर्शनासाठी रांग, ऑनलाइन (क्यूआरकोड) आणि मुखदर्शन अशी सुविधा देवस्थान ट्रस्टने उपलब्ध करून दिली होती. भाविकांना कोणत्याही अडचणींचा सामना करावा लागू नये यासाठी देवस्थान ट्रस्ट, पोलिस प्रशासन, आरोग्य प्रशासन, आरोग्य विभाग, राज्य परिवहन मंडळ आदी सर्व विभागांनी चांगली व्यवस्था केली होती. सीसीटीव्ही कॅमेरे, ध्वनिक्षेपकाद्वारे सूचना देण्याची व्यवस्था केली होती. वाहनांची १ ते ५ अशी पार्किंगची व्यवस्था करण्यात आली होती. पार्किंगपासून बस स्थानकापर्यंत मिनी बसची व्यवस्था केली होती.