पिंपळवंडी, ता. २० : पिंपळवंडी (ता. जुन्नर) येथील रायकरवाडी शिवारातील शेतकरी गुलाब रामचंद्र रायकर यांचे आठ महिन्याचे वासरू सोमवारी (ता. २०) रात्री दीडच्या सुमारास बिबट्याने हल्ला करून ठार केले.
महेंद्र रायकर यांनी सांगितले की, सकाळी गोठ्यात पाहिले असता त्यांना तेथे वासरू आढळून न आल्याने त्यांनी परिसरात शोध घेतला, तसेच वनविभागाला कळविले. वनविभागाच्या कर्मचाऱ्यांनी घटनास्थळी भेट देऊन शोध घेतला असता बाजूच्याच चिकूच्या बागेत त्यांना मृत अवस्थेतील वासरू आढळून आले. गोठ्याची जाळी उचकटून बिबट्याने गोठ्यात प्रवेश करून वासराला बाजूच्या चिकूच्या बागेत नेले. वनविभागाचे वनपाल संतोष साळुंखे यांनी पंचनामा केला. पिंपळवंडी व पंचक्रोशीत बिबट्याचे पाळीव प्राण्यांवरील हल्ल्याचे प्रमाण वाढले असून, वनविभागाने लवकरात लवकर उपाय करावा, अशी मागणी ग्रामस्थांनी केली.