पिरंगुट, ता. २२ : सिद्धेश्‍वर-वेडे (ता. मुळशी) येथे अज्ञात व्यक्तीने लावलेल्या वणव्यात हापूस आंब्याच्या ७० ते ८० झाडांसह नारळ व चिकूचीही झाडे खाक झाली.
सिद्धेश्‍वर-वेडे येथील प्रगतशील शेतकरी नथू लक्ष्मण मारणे यांनी आपल्या सहा एकर डोंगरावर हापूस आंबा, नारळ व चिकू या झाडांची बाग फुलवली आहे. त्यासाठी थेट कोकणातून रोपे आणली आहेत. गेल्या २५ वर्षांपासून त्यांनी कष्टाने ही बाग जोपासली आहे. मात्र, शनिवारी (ता. २०) सकाळी अकरा वाजण्याच्या सुमारास या बागेच्या मागील भागात असलेल्या डोंगराला अज्ञात व्यक्तीने वणवा लावला. त्याची आग मारणे यांच्या बागेमध्ये आली.
दरम्यान, बागेला आग लागल्याची माहिती मिळाल्यानंतर नथू मारणे यांनी तातडीने धाव घेतली. गावातील राहुल अंकुश मारणे व त्यांच्या कामगारांच्या मदतीने आग आटोक्यात आणण्याचा प्रयत्न केला. त्यामुळे निम्म्या बागेचे संरक्षण झाले. मात्र, हापूस आंब्याच्या ७० ते ८० झाडांसह नारळ व चिकूचीही झाडे खाक झाली. त्यामुळे त्यांचे लाखो रुपयांचे नुकसान झाले.
दरम्यान, या नुकसानीचा पंचनामा करण्याची व भरपाई देण्याची मागणी नथू मारणे यांनी केली. तसेच, वणवा लावणाऱ्या संबंधित अज्ञात व्यक्तीचा शोध घेऊन कारवाई करण्याची मागणी केली.

सिद्धेश्‍वर-वेडे (ता. मुळशी) : वणव्याच्या आगीत शेतकरी नथू लक्ष्मण मारणे यांची खाक झालेली झाडे.
PNE23T44472