शिरूर : जिल्ह्यातील राजकीयदृष्ट्या महत्त्वाच्या आणि अग्रगण्य मानल्या जाणाऱ्या शिरूर नगर परिषदेचे नगराध्यक्षपद इतर मागास प्रवर्गातील (ओबीसी) महिलेसाठी राखीव झाले आहे. सन २०११ आणि त्यानंतर २०१६ च्या नगर पालिका निवडणुकीपासून नगर परिषदेवर महिलाराज असून, १५ वर्षे थांबूनही पुन्हा नगराध्यक्षपदाची प्रतीक्षाच करावी लागल्याने गावकारभारी मात्र काहीसे खट्टू झाले आहेत. गेली दोन टर्म नगराध्यक्षपदासाठी महिला आरक्षण येत असल्याने यावेळी नगराध्यक्षपद खुले होईल व आपल्याला मर्दुमकी गाजवता येईल या आशेने अनेकजण गुडघ्याला बाशिंग बांधून तयार होते. तथापि नगराध्यक्षपद ओबीसी महिलेसाठी राखीव झाल्याने महत्त्वाकांक्षी नेते आणि कार्यकर्त्यांचा हिरमोड झाला आहे. तरीही कारभारणीच्या नथीतून तीर मारण्यासाठी हे गावकारभारी सरसावले असून, काहींनी गावचे प्रमुखपद घरच्या पदरात पाडून घेण्यासाठी जय्यत तयारी केली आहे.