पिरंगुट, ता. ४ : आळंदी येथील मुळशी तालुका वारकरी संप्रदाय धर्मशाळेत सलग पस्तीस वर्षे कीर्तन आणि महाप्रसादाची सेवा मुळशीकरांकडून केली जात आहे. एकादशीला कीर्तन आणि द्वादशीला महाप्रसादाचे आयोजन केले जाते. मुळशी तालुक्यातील विविध गावची कुटुंबे नोकरी आणि व्यवसायानिमित्त पुणे शहरात स्थायिक झाली असून ते आता पुणेकर झाले आहेत. पुण्यात राहूनही वारकरी संप्रदायाचा वारसा त्यांनी जपून ठेवला आहे. त्यामुळे आळंदी आणि पंढरी म्हटलं की मुळशीकरांमधील भक्तिभाव, दानशूरता आणि सामाजिक बांधिलकी जागी होते. त्यातूनच शहरी संस्कृतीत राहूनही वारकरी संप्रदायाची जोपासना करण्यासाठी सगळे मुळशीकर एकवटतात.
मुळचे मुळशीकर परंतु पुणेरी झालेल्या वारकऱ्यांना एकत्रित करून वैकुंठवासी गणपत महादू सातपुते आणि वैकुंठवासी मुरलीधर माझिरे यांनी आळंदी येथे पुणेकरांच्या महाप्रसादाच्या पंगतीची प्रथा सुरू केली. हीच परंपरा आता राजेंद्र सातपुते, नरेंद्र सातपुते, विठ्ठल सातपुते, नामदेव माझिरे या त्यांच्या तिसऱ्या पिढीनेही सुरू ठेवली आहे. या उपक्रमाला उद्योजक राजेंद्र चाचरे आणि रावसाहेब हांडे, किरण मारणे, तुषार सातपुते, प्रदीप ऊदागे, अनिल गोरड यांचे सहकार्य आणि योगदान असते.