पिरंगुट, ता. ५ : मुळशी तालुक्यातील लंपी लसीकरणाचे काम प्रगतीपथावर आहे. उर्वरित लसीकरणाचीही कार्यवाही सुरू आहे, असे तालुका पशुसंवर्धन अधिकारी डॅा. सोनल हिंगाडे यांनी सांगितले.
तालुक्यात आतापर्यंत १३४०० लंपी लसीकरण केलेले आहे. अद्यापही ६५०० लसीकरणाची मागणी केलेली आहे. मागील चार महिन्यांत तालुक्यातील लंपीचा प्रादुर्भाव झालेल्या जनावरांची संख्या ४७ आहे. त्यातील उपचारानंतर बरे झालेल्या जनावरांची संख्या ३५ आहे. लसीकरण न केल्यामुळे तालुक्यात दोन लहान वासरांचा मृत्यू झाला आहे. तालुक्यात २० व्या पशुगणनेनुसार गायवर्गीय पशुधनाची संख्या १९३७५ असून म्हैसवर्गीय पशुधनांची संख्या १४७२९ अशी एकूण ३४१०२ इतकी आहे.
दरम्यान, लंपीग्रस्त जनावर आढळून आल्यास त्वरित जवळच्या पशुवैद्यकीय दवाखान्यातील अधिकाऱ्यांस संपर्क साधावा व उपचार सुरू करावेत , असे आवाहन डॉ. हिंगाडे यांनी केले आहे.