परिंचे, ता. २३ : परिंचे (ता. पुरंदर) येथील दुधाळवाडी आणि परिंचे गावातील विठ्ठल रखुमाई मंदिरामध्ये संत शिरोमणी सावता माळी महाराजांचा ७३० वी पुण्यतिथी भक्तीमय वातावरणात साजरी करण्यात आली. यावेळी सावतामाळी महाराजांच्या प्रतिमा रथामध्ये ठेवून दिंडी सोहळा काढण्यात आला. यामध्ये महिला भाविकांनी पारंपरिक वेशभूषा करून सहभाग घेतला. मंदिरामध्ये विविध धार्मिक कार्यक्रमांचे आणि महाप्रसादाचे आयोजन केले होते.
दुधाळवाडी येथील सावतामाळी मंदिरात सकाळी काकड आरती, अभिषेक, महापूजा करण्यात आली. संध्याकाळी सजवलेल्या रथातून संत सावतामाळी महाराजांच्या पादुका आणि प्रतिमा ठेवून टाळ मृदंगाच्या गजरात दिंडी काढण्यात आली होती. या सोहळ्यात सटलवाडी, करवंदे वस्ती, चौधरवाडी येथील सांप्रदायिक भजनी मंडळ व रुद्रगंगा परिंचे पंचक्रोशी दिंडीतील वारकऱ्यांनी सहभाग घेतला होता. सायंकाळी पाच वाजता गावातील प्राचीन दत्त मंदिरात पुजारी जंगम (स्वामी) यांच्या हस्ते सावतामाळी महाराजांची प्रतिमा आणि पादुकांना अभिषेक घालून पूजा करण्यात आली. महाआरती झाल्यावर भाविकांना साखर-खोबऱ्याचा प्रसाद वाटण्यात आला.
सायंकाळी सात वाजता दुधाळवाडी येथील सावतामाळी मंदिरात दिंडी सोहळ्याची सांगता करण्यात आली. यावेळी मंगेश महाराज चौधरी यांच्या प्रवचनाचे आयोजन केले होते. मंदिरात आरती करून भाविकांना महाप्रसाद वाटप करण्यात आला. हा उत्सव साजरा करण्यासाठी धुराजी दुधाळ, शिवाजी दुधाळ, मिलिंद दुधाळ, गणेश दुधाळ, संतोष दुधाळ, सुनील दुधाळ, हरिभाऊ दुधाळ, संजय दुधाळ, नितीन दुधाळ, सावता दुधाळ, हनुमंत दुधाळ, भरत वाघोले, श्रीकृष्ण वाघोले, संभाजी नवले, सुभाष दुधाळ, सुनील शिंदे यांनी परिश्रम घेतले.