पौड, ता. २५ : महाशिवरात्री उत्सवानिमित्त पौड (ता. मुळशी) येथे दरवर्षीप्रमाणे श्रीमल्लिकार्जुन कुस्ती दंगल २०२५ स्पर्धेचे आयोजन करण्यात आले आहे. कुस्तीशौकिनांना विविध नामवंतांच्या कुस्त्यांचा थरार पाहायला मिळणार आहे. गुरुवारी (ता. २७) श्रीमल्लिकार्जुन महादेव मंदिर, पौड येथे या स्पर्धा होणार असल्याची माहिती कुस्ती दंगलचे संस्थापक अमित पिंगळे यांनी दिली.

महाराष्ट्र केसरी पैलवान सिकंदर शेख विरुद्ध पंजाब केसरी उमेश मथुरा यांच्यात या पहिल्या क्रमांकासाठी कुस्ती होणार आहे. या कुस्तीसाठी कै. धनंजय तुकाराम दाभाडे यांच्या स्मरणार्थ मधुर दाभाडे व अमित पिंगळे यांच्याकडून पाच लाख रुपये व चांदीची गदा दिली जाणार आहे. तसेच पृश्वीराज पाक्षल विरुद्ध प्रकाश बनकर, रविराज चव्हाण विरुद्ध कालिचरण सोलनकर, समीर शेख विरुद्ध राहुल सूळ, अनिकेत मांगडे विरुद्ध शुभम कोळेकर, चैतन्य पिंगळे विरुद्ध ओम भरणे या चित्तथरारक कुस्त्या पाहायला मिळणार आहेत. सोनाली मंडलिक विरुद्ध प्रतीक्षा बागडी ही महिलांची कुस्तीही लक्षवेधी ठरणार आहे. तसेच इतर ७५ कुस्त्यांमधून कुस्ती शौकिनांना विविध डाव प्रतिडाव याची रंगत पाहायला मिळणार आहे.

यावेळी आमदार शंकर मांडेकर, महाराष्ट्र केसरी पृथ्वीराज मोहोळ, मुळशी तालुका कुस्तीगीर संघ तालीमचे अध्यक्ष गोविंद आंग्रे, श्रीपाद खटावकर (आरोग्य), वैभव सोनवणे (शौर्य), तुषार खरात (आदर्श सरपंच), उमेश गावडे (उद्योगरत्न), विक्रम क्षीरसागर (खेलरत्न), रवी कुंभार (समाज्जोनती) यांचाही विशेष सन्मान करण्यात येणार असल्याचे अमित पिंगळे यांनी सांगितले.