पौड, ता. १४ : दहावी-बारावीचे निकालही जाहीर झाले आहेत. त्यामुळे पुढील शिक्षणाच्या प्रवेशासाठी विद्यार्थांना विविध प्रकारच्या सरकारी दाखल्यांची आवश्यकता असते. भूगाव (ता. मुळशी) येथील माजी उपसरपंच अक्षय सातपुते यांनी आपल्या जनसेवा महा ई-सेवा केंद्राच्या माध्यमातून सर्व दाखले मोफत देण्याची सोय केली आहे.
विद्यार्थ्यांना पुढील प्रवेशासाठी तसेच, शासनाच्या विविध प्रकारच्या सवलतींचा लाभ मिळविण्यासाठी सरकारी दाखले काढावे लागतात. शाळेचा निकाल लागल्यानंतर प्रवेशावेळी विद्यार्थी दाखले मिळविण्यासाठी पौडला तहसील, ग्रामसेवक, तलाठी यांच्याकडे धावपळ करतात. हे दाखले मिळविण्यासाठी सरकारी दप्तरी अनेक वेळा हेलपाटे मारावे लागतात. गर्दीमुळे दाखले वेळेत मिळणे अवघड होते. परिणामी काही विद्यार्थी, पालकांना नैराश्यालाही सामोरे जावे लागते. ही विद्यार्थी, पालकांची दरवर्षीची व्यथा आहे.
त्यामुळे सातपुते त्यांच्या या केंद्राच्या माध्यमातून प्रत्येक गरजूंना मोफत सरकारी दाखले काढून देत असतात. या उपक्रमातून विद्यार्थ्यांना विविध प्रकारचे दाखले मोफत देण्याची सोय त्यांनी केली आहे.

आपल्या मुलामुलींचे महाविद्यालयीन प्रवेश करत असताना पालक नेहमी उशिरा जागे होतात. प्रवेशप्रक्रिया सुरू झाल्यावर प्रवेशासाठी लागणारी कागद‌पत्रे मिळविण्यासाठी सुरुवात करतात. परिणामी अनेकांचे प्रवेश होत नाहीत, तसेच झालेले प्रवेश रद्दही होतात. सेवा केंद्राच्या माध्यमातून काम करत असताना गेल्या दोन वर्षांमध्ये आलेला हा अनुभव आहे. त्यामुळे आपल्या पाल्याच्या प्रवेशासाठी सजग होऊन प्रवेशप्रक्रिया सुरू होण्याअगोदरच आपल्याला आवश्यक त्या कागदपत्रांची पूर्तता करून घेण्यासाठी सर्व दाखले निःशुल्क देण्याचा उपक्रम सुरू केला आहे.
- अक्षय सातपुते, जनसेवा महा-ई-सेवा केंद्र, भूगाव