पौड, ता. १७ : मुळशी तालुक्यातील पौड पोलिस ठाण्याअंतर्गत येणाऱ्या सर्व गावांतील ग्रामस्थांनी घर भाड्याने देताना काळजी घ्या, भाडेकरूंची सर्व माहिती नजीकच्या पोलिस ठाण्यात द्या, जर भाडेकरू परराज्यातील, तसेच गुन्हेगार प्रवृत्तीचा आढळला तर घरमालकावरही गुन्हा दाखल करण्यात येईल, असा इशारा वरिष्ठ पोलिस निरीक्षक संतोष गिरीगोसावी यांनी दिला आहे.
नोकरी व्यवसायानिमित्त इतर तालुक्यातील, त्याचप्रमाणे परप्रांतातील नागरिक वैयक्तिक किंवा कुटुंबासह मुळशी तालुक्याच्या विविध गावात भाड्याने घर घेऊन स्थायिक आहेत. घरमालकही घर भाड्याने देताना कोणतेही कागदपत्रे, ओळखीचा पुरावा, आधारकार्डची पाहणी करीत नाही. काहीजण त्यांच्याकडून भाडेकरार करून घेत नाही. भाडेकरूंची माहिती ग्रामपंचायत, सरपंच, पोलिस पाटील व पोलिस ठाण्याला कळवली जात नाही. त्यामुळे अनेक गुन्हेगार भाड्याच्या घरात आश्रय घेत असतात.
काही दिवसापूर्वी पौड येथे मूर्तीची विटंबना झाली होती. त्यामुळे तालुक्यात धार्मिक तेढ निर्माण होऊन वातावरण तणावपूर्ण होते. याबाबत तालुक्यातील विविध गावांतील नागरिकांनी एकत्र येत पौड येथे निषेध मोर्चाही काढला होता. विटंबना करणारा युवक हा परप्रांतीय होता. तो ज्या भाड्याच्या घरात राहत होता, त्या घरमालकाने भाडेकरार केलेला नव्हता. तसेच, मालकाने कोणतेही पुरावे पाहिले नसल्याचे निदर्शनास आले. त्यामुळे घरमालकावर पौड पोलिसांनी गुन्हा दाखल केला आहे.
या घटनेची पुनरावृत्ती होऊ नये, यासाठी पौड पोलिसांनी कडक धोरण हाती घेतले आहे. घरमालकाने आपले घर भाड्याने देताना भाडेकरार करणे सक्तीचे आहे. त्याचप्रमाणे ज्यांना घर भाड्याने देत आहे, त्याची मूळ माहिती मिळवणे ही महत्त्वाचे आहे. भाडेकरार आणि भाडेकरूंची माहिती ग्रामपंचायत, तसेच नजीकच्या पोलिस ठाण्यात देणेही गरजेचे आहे. घरमालकाकडे भाडेकरार नसल्यास त्यांच्यावर गुन्हा दाखल करणार असल्याचा इशारा पोलिसांनी दिला आहे.