पौड, ता. २३ : जिल्हा मध्यवर्ती सहकारी बँक आणि मुळशी ॲग्रो पॅक्स प्रोड्यूसर कंपनी यांच्यावतीने तालुक्यातील शेतकऱ्यांना ना नफा ना तोटा या तत्त्वावर सेंद्रिय इंद्रायणी भाताच्या बियाणांची विक्री केली जाणार आहे. सेंद्रिय शेतीला चालना मिळावी. यासाठी हा अभिनव उपक्रम बँकेने सुरू केला आहे. पौड येथे या उपक्रमाचा प्रारंभ करण्यात आला.
मुळशी तालुक्यात होणाऱ्या भाताला पुणे मुंबईच्या बाजारपेठेत मोठ्या प्रमाणावर मागणी असते. तथापि बियाणांची प्रतवारी आणि निसर्गाची साथ यावर भाताचे उत्पादन अवलंबून असते. गेली दोन वर्षांपासून पुणे जिल्हा मध्यवर्ती सहकारी बँकेचे उपाध्यक्ष सुनील चांदेरे यांच्या पुढाकारातून बँक विकास सोसायटीच्या माध्यमातून थेट शेतकऱ्यांकडून भात खरेदी करते. त्यामुळे शेतकऱ्यांनाही भातासाठी हमीभाव मिळत असल्याने आर्थिक फायदा होतो.
सेंद्रिय भात उत्पादन करणाऱ्या शेतकऱ्यांनी हे बियाणे मिळणार आहे. बियाणांची पिशवी ३० किलोची असेल. एका बॅगेची किंमत ७० रुपये प्रतिकिलोप्रमाणे २१०० रुपये असेल.

दरम्यान, पौडला बँकेचे उपाध्यक्ष सुनील चांदेरे यांच्या हस्ते भात बियाणांच्या विक्रीचा प्रारंभ झाला. यावेळी राष्ट्रवादी काँग्रेसचे कार्याध्यक्ष आनंदा घोगरे, बँकेचे विभागीय अधिकारी सुरेश नागरे, भात खरेदी अधिकारी बाबासाहेब ववले, विकास सोसायटीचे अध्यक्ष, उपाध्यक्ष, सचिव, संचालक आणि शेतकरी उपस्थित होते.

04054