पौड, ता. ३० : माजी आमदार संग्राम थोपटे यांच्यासह मुळशी तालुक्यातील काँग्रेसच्या पदाधिकाऱ्यांनी भाजपत प्रवेश केल्यानंतर मरगळ आलेल्या काँग्रेस पक्षाला पुन्हा उभारी मिळू लागली आहे. पक्षाची तालुक्याची कार्यकारणी तयार करण्यासाठी पौड येथे काँग्रेस भवनमध्ये इच्छुकांची आढावा बैठक घेण्यात आली. यावेळी पक्षाची तालुक्याची धुरा सांभाळण्यासाठी अनेकांनी इच्छा प्रकट केली.
बैठकीला पक्षाचे जिल्हाध्यक्ष संजय जगताप, निरीक्षक लहू निवांगुणे, जिल्हा वरिष्ठ उपाध्यक्ष संग्राम मोहोळ यांच्यासह इतर मान्यवर आणि कार्यकर्ते उपस्थित होते. यावेळी जगताप यांनी पक्षाची संघटनात्मक बांधणी अधिक मजबूत करण्यावर भर दिला. मोहोळ यांनीही कार्यकर्त्यांना संबोधित करीत संघटनात्मक प्रक्रियेबाबत आवश्यक सूचना दिल्या. उपस्थितांनी आणि कार्यकर्त्यांनी पक्षाच्या बळकटीकरणासाठी एकजुटीने काम करण्याचा निर्धार व्यक्त केला.
यावेळी पक्षाच्या तालुका अध्यक्षपदासाठी मोहन गोळे, सुरेश पारखी, अशोक मातेरे, मोहन झुंझुरके, मधुसूदन पाडाळे यांनी इच्छा व्यक्त केली. तर युवक काँग्रेस अध्यक्ष पदासाठी महेश मोहोळ, आशिष कांबळे, श्याम शेळके, सौरभ गोळे हे कार्यकर्ते इच्छुक आहेत. ओबीसी काँग्रेस पदासाठी तान्हाजी मरगळे यांनी इच्छा व्यक्त केली. ही बैठक तालुक्यातील पक्षाच्या वाढीसाठी आणि संघटनात्मक बांधणीसाठी महत्त्वपूर्ण ठरेल असा विश्वास कार्यकर्त्यांनी व्यक्त केला.