पौड, ता. १४ : मुळशी तालुक्यात महिनाभरापासून तहसीलदारांची खुर्ची रिकामी असल्याने मुळशीकरांना अनेक समस्यांना तोंड द्यावे लागत आहे. मुळशी तालुका पुणे, मुंबई आणि कोकणला जोडणारा आहे. नैसर्गिक, भौगोलिक वातावरणामुळे पुणे-मुंबईच्या धनदांडग्यांना हा तालुका खुणावतो आहे.
बांधकाम व्यावसायिक, पुढारी, मंत्री, लोकप्रतिनिधींनी मुळशीच्या जागेत पैसा गुंतविला. त्यामुळे जंगल तोड होऊन सिमेंटचे इमले उभे राहिले. जमिनीची खरेदी विक्रीही होवू लागली. तालुक्यातील काही एजंटनी दलालीच्या नावाखाली स्थानिकांची, नातेवाइकांची फसवणूक करून स्वतःचे खिसे भरले. परिणामी कवडीमोल भावात जमीन विकल्या गेल्याने, फसवणूक झाल्याने अनेक स्थानिक भूमिहिन होवू लागल्याचे येथील स्थानिकांचे म्हणणे आहे. त्यामुळे शेतकऱ्यांच्या फसवणुकीच्या अनेक तक्रारी तहसीलदार दप्तरी येत आहेत. परंतु पदच रिक्त राहिल्याने अनेक समस्यांचा निर्णय प्रलंबित राहिला आहे.
महिनाभरापासून हे पद रिक्त आहे. तहसीलदार रणजित भोसले यांना शासनाने निलंबित केल्यानंतर त्यांच्या जागी पिंपरी चिंचवडचे तहसीलदार जयराज देशमुख प्रभारी म्हणून कार्य करीत आहेत. ३० जूनला मीनल भामरे यांच्या नियुक्तीचे आदेश शासनाने काढले, पण दुसऱ्याच दिवशी त्याला स्थगिती दिली. त्यामुळे तहसीलदारांच्या नियुक्तीची मुळशीकर वाट पाहात आहेत. हे पद रिक्त राहिल्याने विद्यार्थ्यांच्या प्रवेश प्रक्रियेला लागणारे विविध दाखले काढण्यासाठी नागरिकांची गर्दी होत आहे. जमीनविषयक अपिलांना सुनावणीसाठी तारीख पे तारीख दिली जात आहे. नागरिकांची महसूलमधली इतर अनेक कामे खोळंबली आहेत. पहिल्यांदाच प्रभारीच्या नेतृत्वाखाली सरपंचपदाचे आरक्षण टाकण्यात आले आहे. आगामी जिल्हा परिषद, पंचायत समितीच्या निवडणुकीतील गण-गटाची रचना आणि आरक्षणाचे महत्त्वाची कामे बाकी आहेत. त्यामुळे खोळंबलेली कामे, तातडीने मार्गी लावण्यासाठी तहसीलदारपद तातडीने भरण्याची गरज असल्याचे स्थानिकांचे म्हणणे आहे.