राहू, ता. २२ : टाळ-मृदंगाचा गजर, ज्ञानोबा माउली तुकारामांचा जयघोष, पारंपरिक वाद्य, भक्तीमय संगीताच्या तालावर रांगोळ्यांच्या पायघड्या, रथाला केलेल्या फुलांची सजावट, फटाक्यांच्या आतषबाजीमध्ये राहू (ता. दौंड)येथील शंभो महादेव पालखी सोहळ्याने (ता. २२) आषाढ वारीसाठी दुपारी बारा वाजण्याच्या सुमारास पंढरपूरकडे प्रस्थान ठेवले.
दरम्यान अभिषेक, विधिवत पूजा, वीणा आणि पादुका पूजन करण्यात आले. पालखी सोहळ्यामध्ये पाच हजारांहून अधिक वारकरी सहभागी झाल्याचे शंभू महादेव पालखी सोहळ्याच्या वतीने सांगण्यात आले. पालखी सोहळ्याचे हे विसावे वर्ष असून सिद्ध सदगुरू शांतीनाथ महाराज यांच्या मार्गदर्शनाखाली तर दिवंगत शंखनाथ महाराज यांच्या आशीर्वादाने हा सोहळा दरवर्षी आषाढ वारीसाठी पंढरपूरकडे मार्गस्थ होत असतो.
पालखीचा रथ ओढण्यासाठी टेळेवाडी (ता. दौंड) येथील बागायतदार संजय बाबूराव टेंगले यांच्या सर्जा राजा बैलजोडीला मान मिळाला आहे. मानाचा अश्‍व पांडुरंग सोनवणे यांच्या स्मरणार्थ दादासाहेब सोनवणे यांचा आहे.
पालखी प्रस्थानाला शांतिनाथ महाराज, आमदार राहुल कुल, कांचन कुल, वैशाली आबणे, शिवाजी सोनवणे, सरपंच दिलीप देशमुख, बंडू नवले, किसन शिंदे, कैलास गाढवे, मनीषा नवले, चिमाजी कुल, रामभाऊ कुल, दिलीप जगताप, पृथ्वीराज जगताप, भगवान झरांडे, दिगंबर जाधव, बापू टेंगले, उद्धव कुल, दिलीप जगताप, भाऊसाहेब चव्हाण, बापू गाढवे, तात्यासाहेब सोनवणे, सुभान कुल, अण्णा शितोळे, मधुकर जाधव, अरुण कुल, स्वप्नील जगताप, गणेश चव्हाण, दिनेश गडदे यांच्यासह शंभू महादेव पालखी सोहळ्याचे विश्‍वस्त उपस्थित होते.
आतार बंधूंनी पालखी सोहळ्यासाठी फटाक्यांची आतषबाजी केली. दोरगे, भुजबळ, मोरे परिवाराच्या वतीने भक्तिमय डीजेची सोय करण्यात आली होती.

असा असेल पालखीचा मुक्काम
खुटबाव, महादेव मळा (ता. २२), मुर्टी वढाणे (ता. २३), मोरगाव (ता. २४), वाकी-चोपडज (ता. २५), होळ (ता. २६), फलटण (ता. २७), बरड (ता. २८), नातेपुते (ता. २९), माळशिरस (ता. ३०), वेळापूर (ता. १ जुलै), वाडी कुरोली (ता. २ जुलै), वाखारी-गाजरे वस्ती (ता. ३, ४, ५ जुलै) आदी गावांमध्ये मुक्काम करीत पालखी सोहळा पंढरपूर येथे पोहोचणार आहे. पालखीचा परतीचा प्रवास ७ जुलैपासून सुरू होणार आहे.