राजगुरुनगर, या. १० : भीमाशंकर- तळेघर- वाडा ते राजगुरुनगर या रस्त्याला राष्ट्रीय महामार्ग म्हणून मान्यता दिल्यानंतर दुपदरी कॉंक्रिटीकरणाचे काम मंजूर झाले आहे. त्याचे राजपत्र २६ मार्च रोजी शासनाकडून प्रसिद्ध झाल्याची माहिती भीमाशंकर देवस्थान संस्थानचे अध्यक्ष ॲड. सुरेश कौदरे यांनी दिली.
भीमाशंकर- वाडा- राजगुरूनगर आणि जुन्नर- घोडेगाव- तळेघर या रस्त्याचे पादचारी मार्गासह चौपदरीकरण आणि मजबुतीकरण होणार असून, त्यासाठी केंद्र सरकारने २३४९ कोटी रुपयांचा निधी मंजूर केलेला आहे. भीमाशंकर ते राजगुरुनगर या रस्त्याला राष्ट्रीय महामार्ग क्रमांक ६० देण्यात आला आहे. खेड तालुक्यातील २५ गावांमधून हा महामार्ग जाणार आहे. राजगुरुनगर ते भीमाशंकर ६० किलोमीटर लांबीचा हा रस्ता असून, त्यासाठी ८७ हेक्टर जमीन संपादित केली जाणार आहे. तर, आंबेगाव तालुक्यातील एका गावातील २ हेक्टर जमीन संपादित केली जाणार आहे. खेड तालुक्यातील कारकुडी, टोकावडे, शिरगाव, धुवोली, वांजाळे, डेहणे, खरोशी, आव्हाट, वाळद, तिफनवाडी, वाडा, दरकवाडी, बुरसेवाडी, गुंडाळवाडी, कडधे, कान्हेवाडी बुद्रुक, मोहकल, कमान, चास, आखरवाडी, पांगरी, पाडळी, सातकरस्थळ, वडगाव, चांडोली या गावांमधून हा नवीन रस्ता जाणार आहे.
या गावांची नावे आणि संपादित होणाऱ्या जमिनींची माहिती राजपत्रात प्रसिद्ध केली आहे. लवकरच संपादन होणाऱ्या गटांची अधिसूचना प्रसिद्ध केली जाईल. नाशिकला सन २०२७मध्ये होणाऱ्या कुंभमेळ्यापूर्वी हा रस्ता व्हावा, असा केंद्र सरकारचा प्रयत्न असणार आहे, असे ॲड. कौदरे म्हणाले.

श्री क्षेत्र भीमाशंकरकडे राजगुरुनगर- चासकमान- वाडा या मार्गाने येण्यासाठीचा रस्ता अरुंद होता. तसेच, तो नेहमी खराब होत होता. त्यामुळे राष्ट्रीय महामार्गाची आमची मागणी होती. हा रस्ता होताना रूंदीकरणासह त्याची दर्जावाढ होणार आहे. अनेक वळणे काढून टाकली जाणार आहेत, तर काही गावांच्या बाहेरून तो नेला जाणार आहे. आता भाविकांची गैरसोय कायमस्वरूपी दूर होईल.
- ॲड. सुरेश कौदरे, अध्यक्ष,
भीमाशंकर देवस्थान संस्थान