राजगुरुनगर, ता. ६ : खेड तालुक्यातील खरपुडी बुद्रुक येथील अपहरण प्रकरणात आपल्या मुलीला जाळ्यात ओढून विश्वनाथ गोसावी याने तिच्याशी लग्न केले असून, त्याचे पहिले लग्न झाले आहे. त्याला दोन मोठी मुले आहेत, असा दावा मुलीचे वडील राजाराम काशीद यांनी केला आहे.
खरपुडी येथील विश्वनाथ गोसावी आणि प्राजक्ता काशीद या प्रेमी युगुलाने आंतरजातीय प्रेमविवाह केलेला असल्याने संतप्त मुलीच्या कुटुंबीयांनी तिच्या पतीला मारहाण करून मुलीला जबरदस्तीने पळवून नेल्याचा गुन्हा रविवारी खेड पोलिस ठाण्यात दाखल झालेला आहे. या प्रकरणी पोलिसांनी प्राजक्ताची आई सुशीला राजाराम काशीद (वय ५०), भाऊ अक्षय ऊर्फ गणेश राजाराम काशीद (वय ३०, दोघेही रा. खरपुडी बुद्रुक) आणि योगीराज सुरेश करवंदे (वय २५, रा. पाबळ रोड, राजगुरुनगर, ता. खेड) यांना अटक केली आहे. न्यायालयाने त्यांना तीन दिवसांची पोलिस कोठडी दिली आहे.
प्राजक्ताचे वडील राजाराम काशीद यांनी मात्र आपल्या कुटुंबावरील सर्व आरोप फेटाळून लावत गोसावी यांच्यावर फसवणुकीचा आरोप केला आहे. ते म्हणाले, ‘‘आपली मुलगी प्राजक्ता ही गेल्या वर्षी आजारी होती. तिला अनेकदा दवाखान्यात नेऊनही प्रकृतीत सुधारणा झाली नाही. म्हणून तिला बाधा झाली असावी, असा तर्क हितचिंतकांनी काढला. त्यावर तोडगा करण्यासाठी तिला खरपुडीतीलच विश्वनाथ गोसावी यांच्या आईच्या आश्रमात नेले. मात्र, आश्रमात गोसावी मायलेकांनी तिला जाळ्यात ओढले आणि फसवून आळंदी येथे विश्वनाथने तिच्याशी लग्न केले. विश्वनाथ याचे पहिले लग्न झाले असून, त्याला दोन मोठी मुले आहेत. पहिली पत्नी अजूनही खरपुडी येथील त्यांच्या आश्रमातच राहत आहे. त्यांचा कायदेशीर घटस्फोट झालेला नसतानाही प्राजक्ताशी त्याने फसवून दुसरे लग्न केले, हा कायद्याने गुन्हा आहे. आमच्या मुलीप्रमाणे अजूनही काही मुली अंधश्रद्धेने फसलेल्या आहेत, पण अब्रू जाईल म्हणून कोणी पुढे येत नाही. म्हणून याची चौकशी होणे आवश्यक आहे.’’
माझ्या या दुसऱ्या लग्नाबाबत माझ्या पहिल्या पत्नीची काही तक्रार नाही. पहिली पत्नी अनेक वर्षे बेडवर पडून आहे. तिची या लग्नाला संमती आहे. आम्ही दोघे मिळून पहिल्या पत्नीचा आणि मुलांचा सांभाळ करत आहोत. दुसऱ्या पत्नीलाही माझ्या मागच्या आयुष्याची माहिती असून, तिचीही त्याबद्दल काही तक्रार नाही.
- विश्वनाथ गोसावी
मी सज्ञान असून, मी स्वखुशीने लग्न केले आहे. मला माझ्या पतीसोबत राहायचे आहे. मी पतीसोबत राहायचे की आई वडिलांसोबत राहायचे, हा माझा व्यक्तिगत अधिकार आहे. त्यासंदर्भात मला कोणीही बळजबरी करू शकत नाही.
- प्राजक्ता गोसावी
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.