रांजणगाव सांडस, ता. १८ : रांजणगाव सांडस (ता. शिरूर) परिसरात परतीचा प्रवास करत असलेल्या संतराज महाराज पालखी सोहळ्याचे उत्साहात स्वागत करण्यात आले. पालखी सोहळा गुरुवारी (ता. १७) सायंकाळी मुक्कामी दाखल झाला. शुक्रवारी वाळकी-रांजणगाव सांडस बेट येथे पालखी सोहळ्याची सांगता होणार आहे. पालखीच्या स्वागतासाठी भाविकास, राजकीय पदाधिकारी उपस्थित होते.
महिलांनी घरोघरी रांगोळी काढून स्वागत केले. परिसरातील वातावरण हरिनामाच्या गजराने भक्तीमय झाले. यावेळी सरपंच प्रदीपा रणदिवे, उपसरपंच प्रवीण रणदिवे, संभाजी रणदिवे, दत्तूनाना रणदिवे, प्रवीण निंबाळकर, वाल्मीक रणदिवे, मच्छिंद्र लोखंडे, एकनाथ शेलार, संताबापू रणदिवे, पंकज रणदिवे, महिंद्र रणदिवे, अप्पामहाराज रणदिवे, शिवाजी रणदिवे, अजित रणदिवे, अमोल काळभोर आदींच्या उपस्थितीत फटाक्यांच्या आतषबाजीने पालखीचे स्वागत केले. पालखी सोहळा ग्रामदैवत भैरवनाथाच्या आणि विठ्ठल-रुक्मिणी मंदिराच्या प्रांगणात मुक्कामी विसावल्यानंतर रांजणगाव येथे गावकऱ्यांच्या वतीने वारकऱ्यांना भोजन देण्यात आले.
संतराज महाराज देवस्थान ट्रस्टचे अध्यक्ष दादामहाराज साठे, पालखी रथाला बैल जोडीचा मान असणारे नागरगावच्या सप्तपदी लॉन्सचे सुभाष शेलार, माजी सरपंच रमेश शेलार, सादलगावचे माजी सरपंच हरिनाना चांदगुडे, नगाऱ्याच्या बैल जोडीचा मान असणारे बाळासाहेब शितोळे, आनंदामहाराज हांडगर, वीणेकरी भानुदास चोरमले, बबनराव साठे, तुळशीवाल्या सुभद्रा सोनवणे, लक्ष्मीबाई सुपेकर, टाळकरी विश्‍वनाथ भंडलकर, झेंडेकरी सोनवणे, साठे, पखवाजवाले पांडुरंग रणदिवे आदींचा यावेळी सत्कार करण्यात आला. रात्री आरती, अभिषेक आणि महादेव महाराज पाटोळे यांच्या कीर्तनाचा कार्यक्रम पार पडला. आज सकाळी राक्षेवाडीकडे न्याहारीसाठी पालखी सोहळा रवाना झाला. या ठिकाणी भक्तिमय वातावरणामध्ये टाळ-मृदंगाचा गजर, हरिनामाचा गजर आणि भाविकांच्या खांद्यावर फडकणाऱ्या भगव्या पताकांच्या वारकऱ्यांचे रांगोळ्यांनी स्वागत करण्यात आले. शुक्रवारी सायंकाळी संगम वाळकी-रांजणगाव सांडस बेट या ठिकाणी पालखी सोहळ्याची सांगता झाली.