रांजणगाव सांडस, ता. २५ : रांजणगाव सांडस (ता. शिरूर) परिसरातील जनावरांची मोफत आरोग्य तपासणी गुरुवारी (ता. २४) करण्यात आली. तसेच, आठ जनावरांना आयपीएफ तंत्रज्ञानाद्वारे भ्रूण प्रत्यारोपण केले.
उपमुख्यमंत्री अजित पवार यांच्या वाढदिवसानिमित्त पुणे जिल्हा दूध उत्पादक संघाचे संचालक निखिल तांबे, माजी संचालक जिवन तांबे यांच्या मार्गदर्शनाखाली शिमजाई दूध उत्पादक संस्था, गुरुदत्त दूध उत्पादक संस्था, राजमाता महिला दूध उत्पादक संस्था, राक्षेवाडी येथील पंचवटी दूध उत्पादक संस्था यांच्या वतीने जनावरांचे वंध्यत्व निवारण व आरोग्य शिबिर आयोजित केले होते. कात्रज दूध उत्पादक संघाच्या कार्यक्षेत्रामध्ये एकूण ८५ ठिकाणी हे शिबिर पार पडले.
जिल्हा दूध संघातर्फे २९५ जनावरांना जंत औषधे देण्यात आली. तसेच ५२ गोठ्यावर गोचीड निर्मूलनासाठी लागणारे औषधे व प्रात्यक्षिके करून ३२२ जनावरांवर उपचार करण्यात आले. या शिबिराचे उद्‍घाटन दूध उत्पादक संघाचे माजी उपाध्यक्ष राहुल दिवेकर यांच्या हस्ते झाले.
यावेळी सरपंच प्रदीपा संभाजी रणदिवे, उपसरपंच प्रवीण रणदिवे, सहकारी दूध संस्थेचे माजी अध्यक्ष रामचंद्र रणदिवे, पंकज रणदिवे, माजी सरपंच उत्तम लोखंडे, बाळासाहेब रणदिवे, अजित रणदिवे, सुदाम रणदिवे, दत्तात्रेय आसवले, महिंद्रा रणदिवे, सोसायटीचे अध्यक्ष सुनील असवले, प्रमोद रणदिवे, राहुल रणदिवे, राजेंद्र रणदिवे, सुखदेव राक्षे, संभाजी लोखंडे, सुनील रणदिवे, दीपक रणदिवे, अमोल काळभोर आदी उपस्थित होते.

लम्पीच्या प्रादुर्भावामुळे पुणे जिल्हा नियंत्रित क्षेत्र म्हणून घोषित केला आहे. पावसाळ्यात कीड, मच्छर आदींमुळे रोग होण्याची शक्यता वाढते. त्यामुळे वेळेवर लसीकरण व कीडनाशक औषधे वापरावीत. गोठ्याची नियमित साफसफाई करावी. जर जनावरे आजारी दिसले तर तत्काळ पशुवैद्यकाचा सल्ला घ्यावा.
- निखिल तांबे, संचालक, पुणे जिल्हा सहकारी दूध उत्पादक संघ.