रांजणगाव सांडस, ता. १४ : रांजणगाव सांडस (ता. शिरूर) येथील ग्रामपंचायत कार्यालयामध्ये पुण्यश्लोक अहिल्यादेवी होळकर यांच्या पुण्यतिथीनिमित्त बुधवारी (ता. १३) प्रतिमापूजन करून अभिवादन करण्यात आले. तसेच येथे हर घर तिरंगा उपक्रमांतर्गत बुधवारी (ता.१३), गुरुवारी (ता. १४) ध्वजवंदन केले.
‘‘अहिल्यादेवी होळकर यांनी धर्मनिरपेक्षता, स्वातंत्र्य, बंधुता, समता व न्याय या तत्त्वाप्रमाणे राज्यकारभार केला. त्यांनी उद्योगधंद्यांना आणि त्यांच्या विकासाला प्राधान्य दिले. आपले संपूर्ण आयुष्य लोक कल्याणकारी कार्यासाठी वेचले. त्यांनी स्त्री शिक्षण, हुंडाबंदी, अनिष्ट चालीरीती रूढी परंपरांचा बीमोड, मूल दत्तक वारसा हक्क, पर्यावरण रक्षक असे सुधारणावादी तसेच ग्रामविकास व पायाभूत सुविधांच्या विकासाच्या योजना राबवल्या. आजच्या समाजकारण आणि राजकारण तसेच विविध क्षेत्रात त्यांच्या कार्याचा आदर्श आजही प्रेरणादायी ठरतो आहे,’’ असे प्रतिपादन पुणे जिल्हा सहकारी दूध उत्पादक संघाचे संचालक निखिल तांबे यांनी याप्रसंगी केले.
यावेळी पुणे जिल्हा सहकारी दूध उत्पादक संघाचे संचालक निखिल तांबे, राष्ट्रवादी काँग्रेस (शरदचंद्र पवार) पक्षाचे जिल्हा युवक उपाध्यक्ष अजित रणदिवे, मुख्याध्यापक हिरामाण शेलार, हरिभाऊ तांबे, हरिभाऊ भंडलकर, संतोष तांबे, पप्पू तांबे, अरुण वसव, विनायक रणपिसे, संतोष कोळपे आदी उपस्थित होते.
RJS25B02998