सोमेश्वरनगर, ता. १४ : बारामती तालुक्यातील मुरूम व शेंडकरवाडी या दोन ठिकाणी मंगळवारी (ता. १४)दुपारच्या सुमारास चक्क लोकवस्तीतील घरफोडी करण्याचे धाडस चोरट्यांनी केले. मुरूम येथे एका घरातून सोने व रोख रक्कम अज्ञात चोरट्यांनी लंपास केली, तर शेंडकरवाडी येथे चोरट्यांचा प्रयत्न अयशस्वी ठरला.
मुरूम येथील सुनील बापूराव काळे यांचे नीरा नदीच्या काठाला असलेले बंद घर दुपारी दोनच्या सुमारास चोरट्यांनी फोडले. दारावरचे कुलूप तोडून घरात प्रवेश केला आणि घरातील नवीन कपाटाचे लॉकर तोडले. त्यातून अडीच तोळ्याचा गंठण, जोडवी, तीन छल्ले, तीन नथ व पाच हजार रुपये रोख, अशी रक्कम चोरट्यांनी लंपास केली, अशी माहिती काळे यांनी दिली. तर, तिथून सहा-सात किलोमीटर अंतरावरील शेंडकरवाडी येथे दुपारी चार वाजता दत्तात्रेय आबूराव चोरगे यांच्या बंद घराचे कुलूप तोडून घरात प्रवेश केला. कपाट खोलून घरातील सर्व साहित्य अस्ताव्यस्त केले, परंतु हाती काही लागले नाही. दुसऱ्या खोलीचे कुलूप तोडण्यात त्यांना अपयश आले.