सोमेश्‍वरनगर, ता. १३ : निंबूत (ता. बारामती) येथील गणेश ग्रामीण बिगरशेती सहकारी पतसंस्थेतील सुमारे दीड कोटी रुपयांच्या अपहारप्रकरणी ऑक्टोबर २०२४ मध्ये सचिव व लेखनिक अशा दोघांवर गुन्हा दाखल झाला होता. आता पुढील तपासानंतर पतसंस्थेचे अध्यक्ष, संचालक व लेखापरीक्षक अशा आणखी १० जणांवर वडगाव निंबाळकर पोलिसांनी गुन्हे दाखल केले आहेत.
निंबूतचा पत्ता असलेली परंतु नीरा (ता. पुरंदर) येथे कार्यालय असलेल्या या पतसंस्थेतील साधारण दीड कोटी रुपयांच्या अपहारप्रकरणी ३ ऑक्टोबर २०२४ मध्ये सचिव सतीश वसंतराव काकडे व लेखनिक नीलेश नरहरी कुलकर्णी (रा. नीरा, ता. पुरंदर) यांच्यावर गुन्हा दाखल झाला होता. सहकार विभागाच्या मार्गदर्शनाखाली के. डी. मोरे व त्यांच्या सहकाऱ्यांनी १ एप्रिल २०२० ते ३१ मार्च २०२३ या कालावधीचे लेखापरीक्षण केले होते. यानंतर मोरे यांनीच वडगाव निंबाळकर पोलिसांत फिर्याद दिली होती. काकडे व कुलकर्णी यांनी दिशाभूल करणारे खोटे व्यवहार नोंदवून सभासदांची फसवणूक केल्याचे स्पष्ट झाले होते.
याप्रकरणी पुढील तपासात संस्थेचे अध्यक्ष राहुल विलास काकडे व त्यांच्या नातेवाइकांनी प्रापंचिक खर्चासाठी पैसे वापरल्याचे समोर आले आहे. घरगुती मिठाई, जलवाहिनी, विमान तिकीट, जेसीबी भाडे अशा स्वरूपाच्या नोंदी आढळून आल्या आहेत. त्याच दरम्यान, पतसंस्थेचे लेखापरीक्षण प्रमाणित लेखापरीक्षक राहुल आदलिंगे व शेखर शिंदे यांनी केले होते. त्यांनीही संस्थेचे खोटे लेखापरीक्षण करून खोटा अहवाल शासनास सादर केला. याबाबत त्या लेखापरीक्षकांनी शासनाची माफीही मागितली आहे. या बाबींचे पुरावे मिळाल्याने अध्यक्ष, संचालक व लेखापरीक्षकांवरही अपहाराचा गुन्हे दाखल केल्याची माहिती वडगाव निंबाळकर पोलिसांनी दिली, तसेच आरोपी फरार असून त्यांचा शोध सुरू असल्याचेही पोलिसांनी सांगितले.

नव्याने गुन्हे दाखल झालेल्यांची नावे : राहुल विलास काकडे (अध्यक्ष), उमेश उत्तम काकडे, औदुंबर दिगंबर ननवरे, रामचंद्र मल्हारराव रणवरे, अविराज बाळासाहेब काकडे, सुवर्णा अभय काकडे, रोहिणी रतन काकडे, रतन शंकर बनसोडे (सर्व संचालक), शेखर विलास शिंदे व राहुल श्रीरंग आदलिंगे (लेखापरीक्षक).