सोमेश्वरनगर, ता. २५ : मुरूम (ता. बारामती) येथील अनिकेत फरांदे दिग्दर्शित ‘दारं’ या लघुपटास नायजेरिया देशातील ‘मॅका इंटरनॅशनल फिल्म फेस्टिवलमध्ये ‘बेस्ट शॉर्ट फिल्म’ पुरस्कार मिळाला आहे. शेतकरीपुत्र व साखर कामगार असलेल्या अनिकेतने ‘शेतीपंपाला रात्रीच्या वेळी वीज दिल्याने शेतकऱ्याला काय भोगावे लागते’ याची मांडणी या लघुपटातून केली आहे आणि तेच परीक्षकांना भावले.
नायजेरिया देशातही शेतकऱ्यांना विजेच्या समस्या होत्या. मात्र, अलीकडे शेतकऱ्यांना परवडणाऱ्या दरात अपारंपरिक ऊर्जा पुरविली जाते. महाराष्ट्रात अजूनही शेतकऱ्यांना दिवसातून केवळ आठ तास वीज उपलब्ध होते. तीही आठवड्यातले चार दिवस रात्रीचीच आणि सतत खंडीत होते. यामुळे शेतकऱ्याला स्वतःच्या जिवाला मुकावे लागते आणि शालेय मुलीला शेतात दारं धरण्यासाठी हातात खोरे घ्यावे लागते, असा ‘दारं’ लघुपटाचा आशय आहे. नायजेरियातील न्याम तेरीकीम्बी यांच्या पुढाकाराने आयोजित फेस्टिवलमध्ये जगभरातील शॉर्ट फिल्म स्पर्धेसाठी आल्या होत्या. परीक्षकांमध्ये भारताचे प्रा. अतुल मरेवाड व संतोष राम, नायजेरियाचे मगाजी मिजीन्यावा, डॉ. तोला बालोगुन, अबुबकर मुहम्मा, नेपाळच्या शुवांगी खडका व इजिप्तचे अमीर रामसेस यांचा समावेश होता. त्यांनी प्रथम क्रमांकासाठी शेतकऱ्याची व्यथा मांडणाऱ्या ‘दारं’ची निवड केली.
चैतन्य साळुंके व राधिका फरांदे यांनी या लघुपटाची निर्मिती केली आहे. जयभीम शिंदे, मंदार कमलापूरकर, अक्षय लोंढे, प्रदीप पवार, पवन भुते, देवा आव्हाड, श्रद्धा जगदाळे यांनी तांत्रिक बाजू सांभाळली. सोरटेवाडी विद्यालयातील जान्हवी लिंबरकर, मलिसद्ध देशमुख, ज्ञानेश्वर वावरे, सोनाली घाडगे, नवनाथ काशीद या कलाकारांनी विविध भूमिका केल्या आहेत. यापूर्वी या लघुपटास जळगाव येथे अजिंठा फिल्म सोसायटीचाही ‘बेस्ट शॉर्ट फिल्म’, लातूर येथील अभिजात फिल्म फेस्टिवलचा ‘बेस्ट सोशल फिल्म’ पुरस्कार मिळाला होता.