सुपे, ता.१७: काऱ्हाटी (ता. बारामती) परिसरात जोरदार वादळी वाऱ्यासह झालेल्या पावसामुळे गुरुवारी (ता. १५) हरितगृह जमीनदोस्त तर सौर पंप, गोठे व झाडे पडून नुकसान झाले. वाऱ्याचा वेग एवढा होता की, शेतातील सौरपंप उडून विहिरीत पडला. नुकसानग्रस्त शेतकऱ्यांनी भरपाई मिळण्याची मागणी प्रशासनाकडे आहे.
वादळी वाऱ्यामुळे सुनील नेवसे यांच्या शेतातील तीन सौरपंप उडून पडले. दोन पंप कूपनलिकेवरील होते. एक पंप शेततळ्यावर बसवलेला होता. शेततळ्यावरील सौरपंप सुमारे ३० फुटांवरील विहिरीत जाऊन पडल्याची माहिती नेवसे यांनी दिली. ते म्हणाले- दोन-चार मिनिटे झालेल्या वादळी वाऱ्याचा वेग भीतीदायक होता. वाऱ्याचा भोवरा तयार झाल्यामुळे मोठे नुकसान झाले. आंब्याची २० व नारळाची आठ झाडे पडून जमीनदोस्त झाली तर महिला आर्थिक विकास महामंडळाच्या सहकार्याने अर्ध्या एकरात लावलेल्या गौरी वाणाच्या मिरचीचा चालू प्लॉट भुईसपाट झाला. सचिन मुरुमकर यांनी कृषी विभागामार्फत नव्यानेच उभारलेले हरितगृह जमीनदोस्त झाले. तर महादेव माकर यांच्या गायांचा गोठा पडून नुकसान झाले आहे.
दरम्यान, परिसरातील सहा शेतकऱ्यांचे नुकसान झाल्याची माहिती ग्राम महसूल अधिकारी श्रावणी गजभिये यांनी दिली. त्या म्हणाल्या की, सचिन बाळासाहेब मुरूमकर, हनुमंत पर्वती जाधव, महादेव साहेबराव माकर, सुनील विठ्ठल नेवसे, अनिल विठ्ठल नेवसे, विठ्ठल तुळशीराम नेवसे, नामदेव नानासाहेब चांदगुडे या शेतकऱ्यांच्या शेतातील शेडनेट हाऊस, सोलर सिस्टीम, शेत पिके, जनावरांचा गोठा अशा प्रकारचे नुकसान झालेले आहे. त्यांचे पंचनामे केले आहेत.
काऱ्हाटी परिसरात गुरुवारी (ता. १५) २० मिलिमीटर तर शुक्रवारी (ता. १६) २७ मिलिमीटर पाऊस झाल्याची माहिती योगेश लोणकर, गजानन लोणकर यांनी दिली. चांदगुडेवाडी परिसरात १९ व २५ मिलिमीटर पाऊस झाल्याचे बाळासाहेब जाधव यांनी सांगितले. तर सुपे परिसरात १२ मिलिमीटर पाऊस झाल्याची माहिती राहुल बोडरे यांनी दिली.

02104