शिरूर, ता. २३ : पैशांच्या देवाण- घेवाणीच्या वादातून २२ नोव्हेंबर २०१७ रोजी रुग्णालयात घुसून तेथील डॉक्टरला मारहाण करून त्यांच्या पत्नीला शिवीगाळ केल्याप्रकरणी सुरेश ज्ञानोबा ओतारी (रा. मुंबई बाजार, शिरूर) याला शिरूर न्यायालयाने सहा महिन्यांची सक्त मजुरीची शिक्षा ठोठावली.
या प्रकरणी डॉ. नारायण मारुती सरोदे यांनी शिरूर पोलिस ठाण्यात फिर्याद दिली होती. ओतारी हे त्यांच्या ओळखीचे असून, त्याच्याकडून त्यांनी १२ हजार रुपये उसने घेतले होते. ते परत केलेले असतानाही ओतारी याने त्यांच्याशी वाद उकरून काढला, असे त्यांनी फिर्यादीत नमूद केले होते. डॉ. सरोदे यांचे रामआळी परिसरात रूग्णालय असून, ते व त्यांच्या पत्नी व माजी नगराध्यक्षा अलका सरोदे रूग्णालयात असताना ओतारी याने दांडके घेऊन रूग्णालयात घुसून डॉ. सरोदे यांच्याकडे पैशांची मागणी केली. ‘आपला व्यवहार मिटला आहे,’ असे सांगण्याचा प्रयत्न केला असता त्याने शिवीगाळ करीत डॉ. सरोदे यांना हातातील दांडक्याने मारहाण केली. अलका सरोदे या भांडण सोडविण्यासाठी मध्ये पडल्या असता त्यांनाही ढकलून देत शिवीगाळ केली. जाताना त्याने, ‘तुमच्या मुलाचे लग्न कसे होते, तेच बघतो. बाहेर भेटल्यावर जीवे मारून टाकतो,’ अशा धमक्याही दिल्या.
शिरूर पोलिस ठाण्याचे पोलिस हवालदार उमेश भगत यांनी या प्रकरणाचा कसून तपास केल्यानंतर न्यायालयात आरोपपत्र दाखल केले. सरकारी वकील सागर कदम यांनी आठ साक्षीदार तपासले. यातील डॉ. धनंजय पोटे, नीलेश गायकवाड व लक्ष्मण पाचर्णे यांची साक्ष मोलाची ठरली. साक्षीपुराव्यांच्या आधारे न्यायाधीश जे. ए. झारी यांनी सुरेश ओतारी याला सहा महिने सक्तमजुरीची शिक्षा ठोठावली. ॲड. शिवशंकर हिलाळ व ॲड. अक्षय घावटे यांनी फिर्यादींना मार्गदर्शन केले.