सासवड, ता. ५ : सासवड (ता.पुरंदर) येथील वाघ डोंगर परिसरात गुरुवारी (ता. ५) पहाटे साडेसहाच्या सुमारास भटक्या कुत्र्यांच्या हल्ल्यात हरणाच्या पाडसाचा मृत्यू झाला.
सासवड येथील वाघ डोंगर परिसरात भटकणाऱ्या कुत्र्यांनी पाडसावर हल्ला केला. या हल्ल्यात ते पाडस गंभीर जखमी झाले. या परिसरात सकाळी फिरायला आलेल्या सासवड येथील नीलेश पवार आणि त्यांच्या काही सहकाऱ्यांनी त्या पाडसाला वाचवण्यासाठी तत्काळ धाव घेतली. त्यांनी मोठ्या प्रयत्नाने कुत्र्यांच्या तावडीतून त्या जखमी पाडसाला सोडवले.
यादरम्यान, एका मुलीने स्वतःचे जर्किन देऊन त्या पाडसाला थंडीपासून संरक्षण दिले. त्यानंतर, त्या जखमी पाडसाला तातडीने वाघ डोंगर वन विभागाच्या कार्यालयात उपचारासाठी आणण्यात आले. वन विभागाच्या कर्मचाऱ्यांनी आणि स्थानिक नागरिकांनी मिळून त्याला वाचवण्यासाठी शर्थीचे प्रयत्न केले. मात्र, दुर्देवाने उपचारादरम्यान त्या पाडसाचा मृत्यू झाला.
या घटनेमुळे भटक्या कुत्र्यांच्या वाढत्या संख्येवर नियंत्रण मिळवण्याची मागणी पुन्हा एकदा जोर धरू लागली आहे. अशा घटनांमुळे नागरीकांसह वन्यजीवांचे जीवन धोक्यात येत असल्याचे या घटनेतून अधोरेखित झाले आहे.