सासवड, ता. १९ : पुरंदर तालुक्यातील काळदरी केंद्रातील कोंडकेवाडी येथील जिल्हा परिषद प्राथमिक शाळेतील विद्यार्थ्यांनी नुकताच भात लावणीचा अनुभव घेतला. बळिराजाच्या अपार मेहनतीची आणि अन्नधान्य पिकविण्यासाठी लागणाऱ्या कष्टाची जाणीव मुलांना व्हावी, या उदात्त हेतूने शाळेत हा विशेष उपक्रम राबविण्यात आला.
गुडघाभर चिखलात उतरून, दिवसभर खाचरात वाकून भात लावणी करणे हे किती कष्टदायक काम आहे, याची प्रत्यक्ष जाणीव मुलांना या उपक्रमातून झाली. शहरी मुलांना शेती आणि शेतकरी यांच्या संघर्षाची ओळख करून देण्यासाठी हा उपक्रम महत्त्वाचा ठरला. या वेळी मुख्याध्यापक विजय पेटकर, सहशिक्षिका तबस्सुम बागवान, शाळा व्यवस्थापन समितीचे अध्यक्ष दत्तात्रेय कोंडके, अंगणवाडी सेविका मीना कोंडके, आरती वांभिरे यांच्यासह पालक व ग्रामस्थ उपस्थित होते. सर्वांनी मुलांच्या उत्साहात सहभाग घेऊन त्यांना प्रोत्साहन दिले. हा स्तुत्य उपक्रम विस्तार अधिकारी राजेंद्र कुंजीर आणि केंद्रप्रमुख प्रवीण इंदलकर यांच्या मार्गदर्शनाखाली पार पडला.