सासवड, ता. २६ : पुरंदर तालुक्यात लंपी चर्मरोगाचा प्रादुर्भाव नियंत्रणात आणण्यासाठी प्रतिबंधात्मक लसीकरण मोहीम आणि प्रतिबंधात्मक उपाययोजना प्रभावीपणे राबवण्यात येत आहेत, अशी माहिती पुरंदर तालुक्याच्या पशुसंवर्धन अधिकारी डॉ. अस्मिता कुलकर्णी यांनी दिली. जिल्हाधिकाऱ्यांच्या आदेशानुसार, पशुसंवर्धन विभागाने आढावा बैठक घेऊन उपाययोजना, सर्वेक्षण आणि औषधोपचार सुरू केले आहेत.
तालुक्यात शासकीय पशुवैद्यकांची कमतरता असूनही, त्यावर तोडगा काढून लसीकरण आणि औषधोपचार केले जात आहेत. यामुळे उपचारानंतर बहुतांश जनावरे बरी होत आहेत. सध्या तालुक्यात १०२ बाधित जनावरे आढळली होती. त्यापैकी ९८ जनावरे बरी झाली आहेत. आता केवळ चार जनावरे बाधित असून, त्यांच्यावरही उपचार आणि लसीकरण सुरू आहे. ती लवकरच बरी होतील, अशी अपेक्षा डॉ. कुलकर्णी यांनी व्यक्त केली. प्रतिबंधात्मक लसीकरण ‘गोट फॉक्स’ लशीद्वारे केले जात असल्याचे त्यांनी सांगितले.