सासवड, ता. ३० : वीर (ता. पुरंदर) येथे सोमवारी (ता. २८) रात्री साडेआठ वाजण्याच्या सुमारास मंगेश धुमाळ यांचे चुलते आणि चुलत भावाला जामीन मिळवून परतणाऱ्या धुमाळ कुटुंबीयांवर १८ जणांनी जीवघेणा हल्ला केला. याप्रकरणी सासवड पोलिस ठाण्यात गुन्हा दाखल केला आहे.
याबाबत फिर्यादी मंगेश महादेव धुमाळ (वय ३६, रा. वीर, ता. पुरंदर) यांनी पोलिस ठाण्यात दिली. याबाबतची माहिती अशी की, सोमवारी रात्री दिलीप विलास धुमाळ आणि चुलत भाऊ अमोल अनासो धुमाळ यांना जामीन मिळाल्यानंतर, मंगेश, अजित विठ्ठल चव्हाण आणि कुटुंब श्रीनाथ म्हस्कोबा मंदिरात दर्शनासाठी गेले होते. दर्शन घेऊन रात्री साडे आठ वाजण्याच्या सुमारास श्रीनाथ म्हस्कोबा मंगल कार्यालयासमोरून मोटारीत बसत असताना १० ते १२ लोकांनी त्यांच्यावर हल्ला केला.
यामध्ये आरोपी करण महादेव वचकल, साहील सावता वचकल, विकास ठकसेन वचकल आणि सौरभ संजय नवले (सर्व रा. वीर) यांनी मोटारीवर दगडफेक करून नुकसान केले. नीलेश नाथ्याबा जामदाडे, सचिन नारायण वाघ, हनुमंत गोपाळ चौरे आणि सतीश महादेव वचकल हे काठ्या घेऊन त्यांचा पाठलाग करत होते. पिराच्या मंदिराच्या कोपऱ्यावर आदित्य भानुदास दुरगाडे, जितेंद्र हनुमंत चौरे आणि इतर दोन अनोळखी व्यक्तींनी त्यांची मोटार अडवून पुन्हा शिवीगाळ केली.
याबाबत सासवड पोलिस ठाण्यात आरोपी करण महादेव वचकल, साहील सावता वचकल, विकास ठकसेन वचकल, सौरभ संजय नवले, नीलेश नाथ्याबा जामदाडे, सचिन नारायण वाघ, हनुमंत गोपाळ चौरे, सतीश महादेव वचकल, आदित्य भानुदास दुरगाडे, जितेंद्र हनुमंत चौरे, कल्पेश वचकल, योगेश वचकल व इतर सहा अनोळखी इसम ( सर्व रा.वीर ता. पुरंदर) यांच्यावर गुन्हा दाखल केला.