सासवड, ता. २ : छत्रपती शिवाजी महाराज यांच्या स्वराज्य स्थापनेतील पहिली लढाई मानली जाणारी बेलसर (ता. पुरंदर) लढाई (शके १५७०, इ.स. १६४८) आणि त्यातील पराक्रमी सरदारांची माहिती देणारे दोन ऐतिहासिक शिलालेख प्रकाशित झाले. या ऐतिहासिक शिलालेखांचे प्रकाशन पुरातत्त्व विभागाचे साहाय्यक संचालक विलास वाहणे आणि पुरंदरचे तहसीलदार विक्रम राजपूत यांच्या हस्ते सासवड (ता. पुरंदर) येथे पुरंदर तहसील कार्यालयात झाले.
या शिलालेखांमध्ये सरदार महिमाकार खंडोजी बाजगीर-नाईक-पाटील-गरुड आणि सरदार कावजी खासनीस यांच्या शौर्याचा उल्लेख आहे. त्यांनी या लढाईत आदिलशाही सैन्याला हरवण्यासाठी केलेल्या व्यूहरचनेची माहिती आहे. तसेच, दुसऱ्या शिलालेखात छत्रपती शिवाजी महाराज यांचे आणखी एक सरदार सोनजी बीन कावजी-नाईक-पाटील-गरुड यांनी फत्तेखानाच्या तळावर ३ हजार सैन्याच्या मदतीने केलेल्या हल्ल्याची माहिती कोरली आहे. या शिलालेखांचे संशोधन सरदार खंडोजी पाटील यांचे १२ वे वारसदार विजय पाटील-गरुड यांनी केले आहे. या ऐतिहासिक स्थळाला राज्य संरक्षित स्मारकाचा दर्जा मिळावा, अशी मागणी त्यांनी केली. कार्यक्रमाला हिंदू जनजागृती समितीचे दीपक आगवणे, छत्रपती संभाजी महाराज प्रतिष्ठानचे अध्यक्ष नितीन पोटे, विश्व हिंदू परिषदेचे योगेश बडदे उपस्थित होते.