सासवड, ता. ११ : गेल्या तीन वर्षांपासून प्रशासकीय राजवट असलेल्या सासवड नगरपालिकेच्या ढिसाळ कारभारावर नागरिकांनी तीव्र नाराजी व्यक्त केली आहे. विशेषतः गावठाण भागातील पिण्याच्या पाण्याची समस्या, तुंबलेली गटार वाहिनी, बंद पथदिवे आणि खराब रस्त्यांमुळे नागरिक हैराण झाले आहेत.
याच मुद्द्यांवरून सोमवारी (ता. ११) माजी आमदार संजय जगताप यांच्या नेतृत्वाखाली भाजपचे पदाधिकारी आणि कार्यकर्त्यांनी मुख्याधिकारी डॉ. कैलास चव्हाण यांना घेराव घातला. एकीकडे सलग सहा वर्षे स्वच्छ सर्वेक्षण अभियानात अव्वल राहण्याचा मान मिळवणाऱ्या सासवडमध्ये सध्या स्वच्छतेचा बोजवारा उडाल्याचे चित्र आहे. अनेक ठिकाणी गटार वाहिनीचे पाणी रस्त्यावर वाहत आहे. घंटागाड्या वेळेवर येत नाहीत, तर जुन्या जलवाहिन्यांमुळे पिण्याच्या पाण्यात गटारीचे पाणी मिसळून दुर्गंधी येत असल्याच्या तक्रारीही नागरिकांनी केल्या आहेत. शहरात कुठेही भाजी विक्रेते बसतात, डुकरे आणि भटक्या कुत्र्यांचा वावर वाढला आहे. उद्याने बंद आहेत आणि महत्त्वाच्या ठिकाणी दिशादर्शक फलक नाहीत, अशा अनेक समस्या नागरिकांनी मांडल्या.
नागरिकांचा रोष लक्षात घेता, मुख्याधिकारी डॉ. कैलास चव्हाण यांनी जिल्हा प्रशासनाकडे प्रलंबित असलेल्या निधीच्या प्रस्तावांचा पुन्हा नव्याने पाठपुरावा करण्याचे आश्वासन दिले.
यावेळी साकेत जगताप, शहराध्यक्ष आनंद जगताप, संतोष जगताप, जयेंद्र निकम, मयूर जगताप, मंदार टिळेकर, यशवंतराव जगताप, संजय चव्हाण, अजित जगताप, मनोहर जगताप, सोपान रणपिसे, राजन जगताप, मोहन शिंदे, सागर जगताप, विजय जगताप, विरेश दहिवाल, वैभव जगताप, महादेव भोंडे यांच्यासह अनेक पदाधिकारी व कार्यकर्ते उपस्थित होते.

आठ दिवसांत कामे न झाल्यास गाव बंदचा इशारा
यावेळी बोलताना माजी आमदार संजय जगताप म्हणाले की, ‘‘सासवडचे नाव बदनाम करण्यासाठी प्रशासन जाणून- बुजून विकासकामांमध्ये अडथळे आणत आहे. मुख्याधिकारी निधी नसल्याचे कारण देत आहेत. त्यामुळे आता शहरातील सर्व गणेशोत्सव मंडळे आणि नागरिक स्वतः पुढाकार घेऊन गावचा कारभार चालवतील. जर येत्या आठ दिवसांत शहरातील रस्ते, पाणी, गटार वाहिनी आणि पथदिव्यांची कामे झाली नाहीत, तर १९ ऑगस्ट रोजी गाव बंद आंदोलन करू.’’