तळेगाव ढमढेरे, ता. २७ : धानोरे (ता. शिरूर) येथील माजी सरपंच अशोक वसंत भोरडे व शेतकरी सुनीता अशोक भोरडे यांच्या गोठ्यातील दोन मेंढ्यांवर बिबट्याने हल्ला करीत ठार केल्या आहेत. सोमवारी (ता. २६) व मंगळवारी (ता. २७) या दोन दिवशी बिबट्याने हल्ला करून दोन मेंढ्या ठार केल्या आहेत. मृत मेढ्यांचा वनरक्षक प्रमोद पाटील यांनी पंचनामा केला आहे. परिसरात गेल्या १५ दिवसांत दररोज येथे बिबट्याचे दर्शन होत असल्याचे भोरडे यांनी सांगितले. त्यामुळे नागरिकांमध्ये भीतीचे वातावरण पसरले आहे. वनविभागाने परिसराची पाहणी करून बिबट्याला पकडण्यासाठी त्वरित पिंजरा लावावा, अशी मागणी माजी उपसरपंच बापूसाहेब शेळके व ग्रामस्थांनी केली आहे.