टाकळी हाजी, ता. ७ : शिरूर तालुक्यातील टाकळी हाजी बेट भाग, तसेच रांजणगाव गणपती औद्योगिक वसाहतीसह परिसरातील अनेक गावांतील तरुण वर्ग ‘एमडी’ (मेथेड्रोन) या अंमली पदार्थाच्या विळख्यात अडकत चालला आहे. या मुळे पालक वर्ग चिंतेत असून पोलिस खाते मात्र याबाबत तक्रार करूनही कोणती ठोस कारवाई करीत नसल्यामुळे सर्वसामान्य माणूस हवालदिल झाला आहे. याबाबतची कारवाई काही दिवसांपूर्वी करण्यात आली होती, परंतु हा प्रश्‍न पुन्हा उद्‍भवत असल्याचे परिसरातील नागरिकांनी सांगितले.
नाव न सांगण्याच्या अटीवर तरुण म्हणाला, ‘‘मीठा सारखा सफेद पदार्थ दोन ते अडीच हजार रुपयांना उपलब्ध होत असून, त्याचे सेवन केल्यानंतर तरुण फोर व्हीलरमध्ये एसी लावून बेधुंदपणे रस्त्यावर फिरत आहे. त्यामुळे अपघातांची शक्यता वाढते आहे. बड्या घरातील अनेक तरुण या नशेच्या आहारी जाऊन शारीरिक, मानसिक आणि आर्थिक स्तरावर उद्ध्वस्त होत आहेत.’’
याबाबत एक सामाजिक कार्यकर्ते म्हणाले, ‘‘आमच्या डोळ्यादेखत तरुण पिढी बरबाद होत आहे. आम्ही सर्व अधिकाऱ्यांकडे तक्रारी केल्या, पण आमच्याच नावांची माहिती ड्रग माफियांना दिली जात असल्याने आमच्या जिवालाही धोका निर्माण झाला आहे.’’ ज्येष्ठ नागरिक म्हणाले, ‘‘पोलिस प्रशासनाने याकडे लक्ष देत असे प्रकार थांबविले पाहिजेत. या संदर्भात जे बोलतात त्यांना गप्प बसविण्याचे काम केले जाते.’’

नशा करण्याचे प्रकार, परिणाम
हा पदार्थ पांढऱ्या किंवा हलकासा पिवळसर रंगाच्या पावडरच्या स्वरूपात आढळतो. काही वेळा टॅब्लेट्स किंवा क्रिस्टल स्वरूपातही मिळतो. नाकाद्वारे (स्नॉर्ट करणे), इंजेक्शन, तोंडातून गोळी स्वरूपात, धूम्रपानाद्वारे हे सेवन केल्यानंतर लगेच नशा येते. काही वेळासाठी अति उत्साह, ऊर्जा, आत्मविश्‍वास आणि आनंद वाटतो. पण हे परिणाम अल्पकालीन असतात. त्यांच्या सेवनाने हृदयाचे ठोके वेगाने होणे, रक्तदाब वाढणे, तापमान वाढणे, मानसिक अस्थिरता जाणवते. तर दीर्घकाळ त्याचे सेवन केल्यास मेंदूला आणि यकृताला गंभीर हानी होते

एम डी आरोग्यास घातक असून तरुणांनी ते सेवन करू नये. या बाबत विक्री होत असल्याची माहिती नागरिकांना मिळाल्यास त्यांनी आमच्याशी संपर्क साधावा, त्यांचे नाव गुप्त ठेवले जाईल. विक्री करणाऱ्यांना कडक शिक्षा करण्यात येईल.
- प्रशांत ढोले, उपविभाग विभागीय पोलिस अधिकारी, शिरूर