टाकळी हाजी, ता. ८ : शासनाने कृषी पंपासाठी नवीन विद्युत जोड देणे बंद केल्यामुळे शिरूर तालुक्यातील शेतकऱ्यांवर संकट ओढावले
आहे. शेतीसाठी पाणी उपलब्ध असूनही ते शेतापर्यंत पोहोचवता येत नसल्याने चिंता वाढली आहे. या पार्श्वभूमीवर शेतकऱ्यांकडून उपसा सिंचन योजनांवर गंडांतर आले असून, स्वतंत्र विद्युत जोड व रोहित्र उपलब्ध करून देण्याची मागणी होत आहे.

सध्या शासनाने तीन ते साडेसात एचपी क्षमतेचे सौर कृषी पंप देण्याचा निर्णय घेतला आहे. हा निर्णय विहीर बागायतदारांसाठी फायदेशीर ठरला असला तरी जास्त लांब अंतरावर उपसा सिंचन करणाऱ्या योजनांसाठी तो पुरेसा ठरत नाही. शिरूर तालुक्यात घोड, कुकडी, भीमा व वेळ नद्यांवर कोल्हापूर पद्धतीचे बंधारे बांधून पाणी अडवले जाते. घोड व थिटेवाडी हे दोन धरणेही आहेत. अनेक शेतकरी एकत्र येत दोन ते तीन किलोमीटरपर्यंत पाइपलाइन टाकून शेतीला पाणी नेण्यांचे स्वप्न पहातात त्यासाठी बॅंकेचे कर्जही घेतात. मात्र, ही योजना चालवण्यासाठी १० ते १२ एचपी क्षमतेच्या विद्युत पंपाची आवश्यकता असते.

सौर पंप केवळ ७.५ एचपी क्षमतेपर्यंतच उपलब्ध असल्याने या मोठ्या योजनांमध्ये तो उपयुक्त ठरत नाही. त्यामुळे शेतकऱ्यांनी पारंपरिक विद्युत पंपासाठी नवीन कनेक्शनची मागणी केली आहे. परंतु शासनाच्या धोरणामुळे सध्या कृषी पंपासाठी नवीन कनेक्शन देणे बंद आहे. परिणामी, उपसा सिंचनाच्या योजनाच थांबल्या असून शेतकऱ्यांचे मोठे नुकसान होत आहे.

शिरूर तालुक्यात पाण्याची उपलब्धता असूनही केवळ विद्युत जोड अभावी उपसा सिंचन योजना बंद पडल्या आहेत. त्यामुळे शासनाने सकारात्मक भूमिका घेत स्वतंत्र रोहित्र व जोड देण्याचा निर्णय घ्यावा, अशी मागणी जिल्हा राष्ट्रवादी काँग्रेसचे उपाध्यक्षराजेंद्र गावडे यांनी केले आहे.

सध्या शासनाच्या धोरणानुसार कृषीपंपांसाठी नवीन जोड देणे बंद आहे. प्रत्येकाला सौर कृषी पंप देण्यात येत आहेत. मात्र शेतकऱ्यांची मागणी लक्षात घेता वरिष्ठ स्तरावर पाठपुरावा केला जाईल.
-सुमित जाधव, उपकार्यकारी अभियंता, महावितरण शिरूर