थेऊर, ता. १६ : पीएमआरडीएकडून रस्त्याचे काम सुरू असताना, शेतातील जलवाहिनी फुटून नुकसान झाले. ते काम माजी आमदार संभाजी कुंजीर यांनी थांबविण्यास सांगितले. त्यामुळे चक्क त्यांनाच एका टोळक्याने धक्काबुक्की करून जीवे मारण्याची धमकी दिल्याची धक्कादायक घटना थेऊर येथे घडली. ही घटना थेऊर येथे ३ जुलैला दुपारी दोन वाजण्याच्या सुमारास घडली आहे.
याप्रकरणी संभाजी रामचंद्र कुंजीर (वय-७६, रा.६९९/२अ. मुकंदनगर पुणे, मुळ रा.वाघापूर ता.पुरंदर जि.पुणे) यांनी नुकतीच लोणी काळभोर पोलिस ठाण्यात फिर्याद दिली आहे. त्यानुसार सुनील वाघमारे (रा.थेऊर, ता.हवेली) व त्याच्या सात ते आठ अनोळखी सहकाऱ्यांवर गुन्हा दाखल केला आहे.
दरम्यान, सुनील वाघमारे व त्याच्या सात ते आठ अनोळखी सहकाऱ्यांवर गुन्हा दाखल करण्यात आला आहे. पुढील तपास लोणी काळभोर पोलिस ठाण्याचे वरिष्ठ पोलिस निरीक्षक राजेंद्र पन्हाळे यांच्या मार्गदर्शनाखाली पोलिस उपनिरीक्षक रत्नदीप बिराजदार करीत आहेत.