थेऊर, ता. १८ : चिक्की खरेदीच्या बहाण्याने दुकानदार महिलेच्या गळ्यातील मंगळसूत्र चोरून नेण्याची घटना थेऊर ग्रामपंचायत हद्दीतील बोडके वस्तीवर रविवारी (ता.२९ जून) सायंकाळी सहा वाजण्याच्या सुमारास घडली होती. नुकताच या गुन्ह्याचा छडा लावून दोन चोरट्यांना पकडण्यास लोणी काळभोर पोलिसांना यश आले आहे. सचिन अर्जुन ढगे (वय १९ रा. कदम बंगल्याजवळ, माऊली नगर, कात्रज, पुणे) व रोहित राजू माने (वय २५ रा. निंबाळकर वस्ती,दत्त मंदिराजवळ, कात्रज) असे अटक करण्यात आलेल्या आरोपींची नावे आहेत. याप्रकरणी संगीता पंडित बोडके (वय-४८, रा. बोडकेवस्ती, काकडे मळा रोड, थेऊर) यांनी पोलिस ठाण्यात फिर्याद दिली होती.
लोणी काळभोर पोलिसांनी दोन्ही आरोपींना ताब्यात घेऊन अधिक चौकशी केली असता,आरोपींनी गुन्ह्याची कबुली पोलिसांना दिली. पोलिसांनी चोरलेले १० ग्रॅम वजनाचे सोन्याचे मंगळसूत्र व गुन्हा करतेवेळी वापरलेली दुचाकी असा एक लाख १० हजार रुपयांचा मुद्देमाल जप्त केला आहे. वरिष्ठ पोलिस निरीक्षक राजेंद्र पन्हाळे यांच्या नेतृत्वाखाली त्यांच्या सहकाऱ्यांनी ही कामगिरी केली आहे.