थेऊर, ता. २५ : लोणी काळभोर (ता. हवेली) येथे मागील सहा महिन्यांपासून अल्पवयीन विद्यार्थिनीचा पाठलाग करून छेडछाड केल्याची धक्कादायक घटना गुरुवारी (ता. २४) उघडकीस आली आहे. याप्रकरणी सचिन किसन राठोड (वय २०) याला काळभोर पोलिसांनी अटक केली आहे.
याप्रकरणी पीडितेच्या भावाने लोणी काळभोर पोलिस ठाण्यात फिर्याद दिली आहे. त्यानुसार पोलिसांनी आरोपी राठोड याच्यावर गुन्हा दाखल केला आहे. पोलिसांनी दिलेल्या माहितीनुसार, विद्यार्थिनीला आणण्यासाठी फिर्यादी गेला होता. पिडिता शाळेजवळ रडत थांबली होती. तेव्हा फिर्यादीने का रडतेस? असे विचारले, तेव्हा तिने सांगितले की, शाळा सुटल्यानंतर मी शाळेजवळ वाट पाहत होते. तेव्हा आरोपी राठोड हा त्याच्या मोटार सायकलवरून आला. त्याने दोनवेळा माझ्याकडे एकटक पहिले. त्यानंतर राठोड हा तिसऱ्यांदा माझ्याकडे आला आणि तू काय करत आहेस? असे विचारले. दरम्यान, आरोपीने फेब्रुवारी २०२५ ते २४ जुलै यादरम्यान पीडितेची वारंवार छेडछाड केली आहे. घाबरून याबाबतची वाच्यता तिने कुठेही केली नव्हती. मात्र, आरोपीने थेट जवळीक साधण्याचा प्रयत्न केल्याने विद्यार्थिनीने घडलेला सर्व प्रकार भावाला सांगितला.