थेऊर, ता. २१ : सिमेंटच्या मालाची ऑर्डर पोच करण्यासाठी आलेल्या ट्रक चालकाला जिवे मारण्याची धमकी देऊन त्याच्या ताब्यातील ५० लाख रुपये किमतीचा अशोक लेलैंड ट्रक पळवून नेल्याची घटना कदमवाकवस्ती कदमवाकवस्ती येथील दत्त मंदिराजवळ असलेल्या बालाजी सिमेन्ट वेअरहाउस जवळ मंगळवारी (ता. १९) मध्यरात्री एक वाजण्याच्या सुमारास घडली होती.
येथील दत्त मंदिराजवळ असलेल्या बालाजी सिमेंट वेअरहाऊस जवळ मंगळवारी (ता. १९) मध्यरात्री एक वाजण्याच्या सुमारास घडली होती. या गुन्ह्यातील दोन्ही आरोपींना लोणी काळभोर (ता. हवेली) पोलिसांना अवघ्या दोन तासांच्या आत इंदापुरातून अटक केली. तर, त्यांनी लपवून ठेवलेला ट्रकही जप्त करण्यात पोलिसांना यश आले.
ही घटना मल्लिकार्जुन शांताच्या अवंती (वय ३३, रा. मल्लिकार्जुन रस्ता, कोडला, ता. शेडम, जि. गुलबर्गा, कर्नाटक) व अशोक शिवाप्पा राठोड (वय ३९, रा. पद्मसागर कॉलनी, योगापूर रस्ता, जि. विजापूर, कर्नाटक), अशी अटक केलेल्या आरोपींची नावे आहेत. याप्रकरणी अनुज कुमार रामसुरत पांडे (वय २४, रा. माधवपूर आचार, पो. आगई, कुडवार, जि. सुलतानपूर, उत्तर प्रदेश), यांनी लोणी काळभोर पोलिस ठाण्यात फिर्याद दिली होती. त्यानुसार वरील गुन्हा दाखल केला आहे.
या गुन्ह्याचे गांभीर्य लक्षात घेऊन लोणी काळभोर पोलिस ठाण्याचे वरिष्ठ पोलिस निरीक्षक राजेंद्र पन्हाळे यांनी गुन्हे शोध पथकाचे प्रमुख सहाय्यक पोलिस निरीक्षक कृष्णा बाबर व त्यांच्या सहकाऱ्यांचे पथक तयार केले होते. पथकातील पोलिस हवालदार रामहरी वणवे यांना आरोपी हे इंदापूरच्या दिशेने पळून गेले आहेत, अशी माहिती एका खबऱ्यामार्फत मिळाली. त्याच्या अनुषंगाने पोलिसांचे पथक आरोपीला पकडण्यासाठी इंदापूरच्या दिशेने रवाना झाला. पोलिसांनी इंदापुरात सापळा रचून अवघ्या दोन तासांच्या आत आरोपींना बेड्या ठोकल्या.
दरम्यान, पोलिसांनी आरोपींना चोरीच्या ट्रकबाबत विचारणा केली तेव्हा त्यांनी उडवाउडवीची उत्तरे दिली. मात्र, पोलिसांनी खाक्या दाखविताच त्यांनी माहिती दिली. त्यानंतर पोलिसांनी ट्रकही ताब्यात घेतला. ही उल्लेखनीय कामगिरी राजेंद्र पन्हाळे, गुन्हे शाखेच्या पोलिस निरीक्षक स्मिता पाटील, कृष्णा बाबर, रामहरी वणवे, गणेश सातपुते, सचिन सोनवणे, सूरज कुंभार यांनी केली.