उरुळी कांचन, ता. १५ : पुणे-सोलापूर महामार्गावर थेऊर फाटा (ता. हवेली) येथे रविवारी (ता. १५) बेकायदेशीररीत्या गोमांस वाहतूक करणाऱ्या सुमो वाहनास राजगुरुनगर (ता. खेड) येथील बजरंग दलाच्या कार्यकर्त्यांनी पकडून दिले. मात्र, वाहनचालक फरारी झाला. या प्रकरणी लोणी काळभोर पोलिस ठाण्यात गुन्हा दाखल केला असून, ७०० किलो गोमांस वाहतूक करणारे वाहन जप्त केले आहे.
मिळालेल्या माहितीनुसार, दीपक गावडे, कृष्णा चौधरी, ओंकार जाधव, कुणाल इंटक, निखिल ठिगळे, कल्पेश गाडे, तेजस भानुसे हे सर्व बजरंग दलाचे कार्यकर्ते असून, ते पुणे जिल्ह्यातील राजगुरुनगर येथील रहिवासी आहेत. हे सर्व जण पुरंदर तालुक्यातील भुलेश्वर येथे देवदर्शनाला आले होते. परतीच्या प्रवासात ते थेऊर फाटा येथे अंदाजे सकाळी ७ वाजता होते. त्यावेळी त्यांना पुढे चाललेल्या वाहनातून महामार्गावर रक्त सांडताना दिसून आले. त्यांना या वाहनात गोमांस असल्याची शंका आली. त्यानुसार त्यांनी वाहनाला ओव्हरटेक करून अडविले. मात्र, त्यावेळी या वाहनाचा चालक फरारी झाला. त्यांना वाहनामध्ये गोमांस आढळून आले. त्यानंतर त्यांनी लोणी काळभोर पोलिसांशी संपर्क केला. पोलिसांनी या प्रकरणी सदर वाहन जप्त करून अज्ञात व्यक्तीवर गुन्हा दाखल केला.