वडगाव निंबाळकर, ता. ८ ः शिरूर- सांगवी मार्गावर सिमेंट कॉंक्रिटीकरण रस्त्याचे काम सुरू आहे. ज्या भागातील काम पूर्ण झाले आहे, अशा गावातून साइड पट्ट्या भरून घ्याव्यात, अशी मागणी प्रवासी, नागरिक करीत आहेत.
मुढाळे (ता. बारामती) गावात रस्त्याचे काम पूर्ण झाले आहे. मात्र, साइड पट्ट्या भरल्या न गेल्यामुळे रस्त्यावर येताना वाहनांना अडथळा होत आहे. गावातील रस्त्यांना जोडल्या गेलेल्या मार्गावर तात्पुरत्या स्वरूपात माती टाकून नागरिकांनी मुख्य रस्त्यावर वाहने येण्यासाठी सोय केली आहे. मात्र, पक्क्या रस्त्यावर जाण्यासाठी मुरूम टाकला जावा, अशी मागणी नागरिकांमधून होत आहे.
वेळेत साइड पट्ट्या न भरल्या गेल्यास मोठी वाहने रस्त्यावर येताना मुख्य रस्त्याचे नुकसान होऊ शकते. नुकताच झालेल्या रस्त्याचा दर्जा टिकून राहावा यासाठी वेळेत साइड पट्ट्यांची कामे पूर्ण करावी, अशी मागणी होत आहे. याबाबत ग्रामस्थांच्या वतीने संबंधित ठेकेदाराकडे मागणी केली असल्याची माहिती मुढाळ्याचे सरपंच जयपाल साळवे यांनी दिली.

शिरूर- सांगवी सिमेंट कॉंक्रिटीकरण रस्त्याचे काम दर्जेदार करून घेण्यासाठी ग्रामस्थांनी सहकार्य करावे. मुढाळे गावातील साइड पट्ट्या भरण्याचे आदेश ठेकेदाराला दिले आहेत.
-श्रीपाद बेलसेटवार, उपअभियंता, सार्वजनिक बांधकाम विभाग