वडगाव निंबाळकर, ता. १९ ः कोऱ्हाळे खुर्द, वडगाव निंबाळकर व कांबळेश्वर या गावांमध्ये अचूक शेती तंत्रज्ञान, कृत्रिम बुद्धिमत्ता यांचा वापर तसेच विविध कृषी योजनांबाबत मार्गदर्शन कार्यक्रम पार पडला. जीवोदया प्रकल्प व शिवा काका कारंडे फाउंडेशन होळ-सदोबाचीवाडी (ता. बारामती) यांच्या संयुक्त विद्यमाने हा उपक्रम झाला. यामध्ये शेतकऱ्यांना आधुनिक शेती पद्धतीची सविस्तर माहिती देण्यात आली. तसेच, बीज प्रक्रियेचे महत्त्व, हिरवळीच्या पिकांचा जमिनीच्या सुपकतेसाठी होणारा उपयोग, रासायनिक खतांऐवजी शेणखताचा वापर करण्याबाबत मार्गदर्शन करण्यात आले. यासोबतच पाण्याचा कार्यक्षम वापर करण्यासाठी ठिबक सिंचन प्रणालीचे फायदे सांगून कृषी विभागामार्फत उपलब्ध योजनांची माहिती सहाय्यक कृषी अधिकारी स्वप्निल कारंडे यांनी दिली. एआय आधारित अचूक शेती तंत्रज्ञानाचा स्वीकार करून उत्पन्न वाढीसाठी कसे प्रयत्न करता येतील याबाबत पीक तज्ज्ञ डॉ. राधेश्याम गुंड यांनी शेतकऱ्यांशी चर्चा केली. यावेळी जितेंद्र पवार, रंजीत घाडगे, बाळासाहेब हिरवे, निलेश मदने, विजय हिरवे, हर्षद खोमणे, दत्तात्रेय चव्हाण, राहुल पिंगळे, विशाल खलाटे यांच्यासह ऊस उत्पादक शेतकरी उपस्थित होते.