वडापुरी, ता. १२ : वडापुरी (ता. इंदापूर) येथे मध्यरात्री शेळ्या चोरण्यास आलेल्या चोरट्यांनी शेळीमालक वसंत पवार यांना गंभीर मारहाण केली व चार शेळ्या चोरून नेल्या. ही घटना रविवारी (८) रात्री घडली. याप्रकरणी इंदापूर पोलिसांनी तीन अज्ञात चोरट्यांविरुद्ध गुन्हा दाखल केला आहे.
चोरीबाबत लक्ष्मी वसंत पवार यांनी दिलेल्या फिर्यादीत म्हटले आहे की, रविवारी रात्री दीडच्या सुमारास कुत्री भुंकण्याचा आवाज आल्याने पती वसंत पवार हे उठून बाहेर गेले. त्यावेळी त्यांच्या शेळ्यांजवळ तीन अनोळखी चोरटे उभे होते. त्यातील एका चोरट्याने पवार यांना दगड फेकून मारला. तो त्यांच्या डोक्यात लागला. दुसऱ्या एकाने तेथे पडलेली खुंटी ठोकायचा घन पती वसंत पवार यांच्या पाठीत मारला. त्यामुळे ते गंभीर जखमी झाले. दरम्यान, यावेळी चोरट्यांनी तीन शेळ्यांसह एक बोकड असा अंदाजे २० हजार रुपयांचा ऐवज चोरी नेला.

दरम्यान, यावेळी घराशेजारील विठ्ठल जाधव यांना वसंत पवार यांनी बोलविले. त्यानंतर पवार यांना सुरवड येथील स्वप्नील घोगरे यांच्या मदतीने इंदापूर येथील उपजिल्हा रुग्णालयात उपचारासाठी दाखल केले. या घटनेचा तपास इंदापूर पोलिस करीत आहेत.
चोरीच्या घटनेने नागरिक धास्तावले आहेत. पोलिसांनी चोरट्यांचा त्वरित बंदोबस्त करावा, अशी मागणी जोर धरत आहे.