वेल्हे, ता.२१ : करंजावणे (ता.राजगड) येथील शेतकरी रावसाहेब कांबळे यांच्या शेतामध्ये भात लावणी करण्यासाठी चिखल करताना एक नुकताच ट्रॅक्टर चिखलात अडकला. त्यास काढण्यासाठी सुमारे चार, पाच, सात नव्हे नव्हे तर दहा ट्रॅक्टर लागले. मात्र तेही चिखलात रुतले.
ट्रॅक्टर अडकल्यानंतर गावात उपलब्ध असलेल्या चार-पाच ट्रॅक्टरनंतर गावात ट्रॅक्टर शिल्लक नसल्याने परिसरातील अडवली, मांगदरी, वांगणी, या गावांमधून ट्रॅक्टर मागविण्यात आले. मात्र, गावोगावी भात लावण्याची सुरुवात असल्याने ट्रॅक्टर मिळण्यास मोठी अडचण होत होती. मात्र, परिस्थितीचे गांभीर्य लक्षात घेऊन ट्रॅक्टर चालक व मालकांनी हे ट्रॅक्टर बाहेर काढण्यासाठी एकत्र येत सुमारे आठ तास झुंज दिली. मोठ्या परिश्रमाने सकाळी आठ वाजता शेतात अडकलेला ट्रॅक्टर दहा ट्रॅक्टरच्या सहाय्याने सायंकाळी सहा वाजण्याच्या सुमारास शेतातून बाहेर पडला. मात्र या झालेल्या त्रासामुळे शेत मालक तसेच ट्रॅक्टर मालकांचे ऐन भात लावणीच्या वेळेस मोठे नुकसान झाले. मात्र, उपस्थित नागरिकांनी या घटनेचे चित्रीकरण करत व्हिडिओ सोशल मीडियात व्हायरल केले.
03134