वेल्हे, ता.२० : खडकवासला धरणाच्या पाणलोट क्षेत्रातील रुळे (ता. राजगड) येथे मासेमारी करण्यासाठी गेलेल्या आदिवासी तरुणाचा पाण्यात पडून मृत्यू झाला. ही घटना रविवारी ( ता.२०) सायंकाळी चारच्या सुमारास घडली. सचिन बाळू जाधव (वय.३८, रुळे, ता. राजगड) असे मृत तरुणाचे नाव आहे. त्याचा भाऊ संतोष बाळू जाधव याने वेल्हे पोलिस ठाण्यात रात्री उशिरा फिर्याद दाखल केली आहे.
याबाबत वेल्हे पोलिसांनी दिलेल्या माहितीनुसार रुळे गावच्या हद्दीत विठ्ठल राऊत यांच्या वीटभट्टी जवळ खडकवासला धरणाच्या बॅक वॉटर पाण्यामध्ये सचिन मासेमारी करण्यासाठी गेला असता पाण्यात पडून बुडून मृत्यू झाला आहे. याप्रकरणी वेल्हे पोलिस ठाण्याचे प्रभारी अधिकारी सहाय्यक पोलिस निरीक्षक नितीन खामगळ अधिक तपास करीत आहेत.