वालचंदनगर, ता. २० ''''छत्रपती शिवाजी महाराज हे युगपुरुष, शूरवीर, दानशूर तसेच न्यायी राजे होते. रयतेचा राजा कसा असावा याचा पायंडा छत्रपतींनी रचला. युवकांनी छत्रपती शिवाजी महाराजांच्या इतिहासाचे वाचन करून त्यांच्या व्यक्तिमत्त्वाची अनमोल वैशिष्ट्ये जाणून घेऊन ती आचरणात आणावीत,'''' असे आवाहन माजी राज्यमंत्री दत्तात्रेय भरणे यांनी व्यक्त केले.
लासुर्णे (ता.इंदापूर) येथे शिव फाउंडेशनच्या वतीने आयोजित केलेल्या शिवजयंतीच्या कार्यक्रमामध्ये बोलत होते. यावेळी भरणे यांनी सांगितले की, छत्रपतींचे संघटन कौशल्य, सामाजिक सलोखा, दूरदृष्टीसारखे अनेक पैलू महाराजांचे घेण्यासारखे आहेत. यावेळी भरणे यांच्या हस्ते छत्रपतींच्या पुतळ्यास पुष्पहार अर्पण करण्यात आला. यावेळी लासुर्णेचे सरपंच सागर पाटील, हेमंत पाटील, श्री छत्रपती सहकारी साखर कारखान्याचे संचालक बाळासाहेब पाटील, डॉ.योगेश पाटील, विजय निंबाळकर, निखिल भोसले, संतोष लोंढे, डॉ. महादेव मोहिते, अरुण कदम, सुनील थोरात, सुहास भोसले उपस्थित होते.

दरम्यान, शिवजंयतीनिमित्त निकाली कुस्त्यांचे जंगी मैदानाचे आयोजन केले होते. यावेळी दीडशेहून अधिक जंगी कुस्त्या झाल्या. कुस्ती मैदानासाठी पहिलवान वस्ताद रणजित निंबाळकर, पहिलवान सुरेश निंबाळकर, पहिलवान तुषार लोंढे, पहिलवान सुनील थोरात, पहिलवान साजन लोंढे यांच्या मार्गदर्शनाखाली कुस्त्या पार पडल्या.

शिवजयंतीच्या कार्यक्रमस्थळी पुणे जिल्हा परिषदेचे माजी सभापती प्रवीण माने, पंचायत समितीचे माजी सभापती करणसिंह घोलप,नीरा-भीमा सहकारी साखर कारखान्याचे संचालक राजवर्धन पाटील यांनीही भेट छत्रपती शिवाजी महाराजांना अभिवादन केले. वालचंदनगर पोलिस ठाण्याचे पोलिस उपनिरीक्षक अतुल खंदारे, पंचायत समितीचे माजी उपसभापती हेमंत नरुटे, गजानन वाकसे उपस्थित होते.

02976