वालचंदनगर, ता.२२ भवानीनगर (ता. इंदापूर) येथील श्री छत्रपती सहकारी साखर कारखान्याच्या ऊस लागणीच्या नोंदीच्या धोरणामध्ये बदल केला असून एक जुलै व १६ जुलै रोजी लागवड केलेल्या उसाची नोंद लकी ड्रॉ (सोडत) पद्धतीने घेण्यात येणार असल्याची माहिती कारखान्याचे अध्यक्ष पृथ्वीराज जाचक व उपाध्यक्ष कैलास गावडे यांनी दिली.
श्री छत्रपती सहकारी साखर कारखान्याने सन २०२५-२०२६ चे ऊस लागवड धोरण जाहीर केले आहे. १ जुलै २०२५ पासून ऊस लागवड करण्यास परवानगी देण्यात आली आहे. लागण नोंद देण्यासाठी सभासदांची नेहमीच गर्दी होते. सभासदांची गैरसोय टाळण्यासाठी तसेच गर्दी कमी करण्यासाठी चालू वर्षीपासून ऊस लागवड घेण्याच्या प्रचलित पद्धतीमध्ये बदल करण्याचा निर्णय संचालक मंडळाने नुकत्याच झालेल्या संचालक मंडळाच्या बैठकीमध्ये घेतला आहे.
ऊस लागण नोंद घेण्याच्या नवीन पद्धतीनुसार एक जुलै रोजी को-एम ०२६५ व १६ जुलै रोजी को- ८६०३२ व पी. डी.एन. १५०१२ या जातीच्या उसाची लागवड नोंदणी अर्ज त्या दिवशी सकाळी सात ते १० वाजेपर्यंत गाव व विभागानूसार घेण्यात येणार आहेत. तसेच त्याच ठिकाणी सकाळी ११ वाजता लागण नोंदणी फॉर्मची सोडत काढण्यात येणार असून, सोडतीप्रमाणे उसाची तोडणी होणार आहे. तसेच एक जुलै रोजी को- ०२६५ या ऊस जातीचे नोंद दिलेल्या ऊस क्षेत्राची लागवड तीन जुलैपर्यंत व १६ जुलै रोजी को- ८६०३२ व पी.डी. एन. १५०१२ या ऊस जातीचे नोंददिलेल्या ऊस क्षेत्राची लागवड १८ जुलै पर्यंतच्या मुदतीतच पूर्ण करावी लागणार आहे. मुदतीत उसाची लागवड पूर्ण झाली नसल्यास प्रत्यक्ष पाहणीत निदर्शनास आल्यानंतर सदरची नोंद रद्द करण्यात येणार आहे.

कायम केलेल्या उसक्षेत्राची यादी पाच जुलैला लावणार
रद्द केलेल्या व लागवड होऊन कायम केलेल्या ऊस क्षेत्राची सभासदनिहाय को- ०२६५ जातीच्या उसाची लागण नोंदीची यादी पाच जुलैला तर को- ८६०३२ या व्हरायटीची व पी.डी. एन. १५०१२ या व्हरायटीची लागण नोंदीची यादी २० जुलै रोजी ग्रामपंचायत व सोसायटी कार्यालयास लावण्यात येणार आहे. एक जुलै व १५ जुलै या दोन लागण तारखा वगळता इतर लागण नोंदी पूर्वप्रमाणेच घेतल्या जाणार असल्याचे कारखान्याचे अध्यक्ष पृथ्वीराज जाचक व उपाध्यक्ष कैलास गावडे यांनी सांगितले.