वाल्हे, ता. ६ : सुकलवाडी (ता. पुरंदर) येथे घरासमोर सडा रांगोळी रेखाटत ग्रामपंचायतीच्या पदाधिकाऱ्यांसह युवा सरपंच संदेश पवार यांनी ‘लेक वाचवा, लेक शिकवा’ चा नारा देत गावातील लेकींचे औक्षण करून व घराला तिच्या नावाची पाटी लावून स्त्री सन्मानाचा अनोखा उपक्रम राबविला. या माध्यमातून क्रांतिज्योती सावित्रीबाई फुले यांना जयंतीनिमित्त अनोख्या पद्धतीने अभिवादन करण्यात आले.

याप्रसंगी सरपंच संदेश पवार यांच्या हस्ते सकाळी ग्रामपंचायत कार्यालयामध्ये सावित्रीबाईंच्या प्रतिमेचे पूजन झाले. दरम्यान, सायंकाळी ग्रामपंचायतीचे पदाधिकारी व ग्रामस्थ आदींनी जिल्हा परिषद प्राथमिक गुणवंत शाळेतील विद्यार्थिनींच्या घराच्या दारावर या मुलींच्या नावाची पाटी मान्यवरांच्या हस्ते लावली. त्यानंतर विद्यार्थिनींचे औक्षणही करण्यात आले. या उपक्रमाच्या माध्यमातून ‘लेक वाचवा लेक शिकवा’ हा संदेश देण्याचा प्रयत्न केला आहे, असे सरपंच पवार यांनी सांगितले.
आपल्या गावातील लेकींचा असा अनोख्या पद्धतीने केलेला सन्मान पाहून व सरपंचांच्या या अनोख्या उपक्रमाने पालकही भारावून गेले होते. या वेळी योगेश पवार, वैजयंता दाते, शीतल पवार, सुप्रिया पवार, नम्रता पवार, अमृता चव्हाण, शर्मिला पवार, मनोज घाटे, मयूर सुर्वे आदि उपस्थित होते.
यानंतर वाल्हे (ता. पुरंदर) येथील ग्रामपंचायत कार्यालयामध्ये देखील सावित्रीबाई फुले यांची जयंती साजरी झाली. या वेळी सरपंच अतुल गायकवाड यांच्या हस्ते सावित्रीबाईंच्या प्रतिमेचे पूजन करून त्यांना अभिवादन करण्यात आले. याप्रसंगी ग्रामपंचायत सदस्य सागर भुजबळ, संतोष दुर्गाडे, त्रिंबक भुजबळ, सुजित राऊत, महेश पवार आदि उपस्थित होते. या कार्यक्रमाचे प्रास्ताविक ग्रामविकास अधिकारी राजाराम शेंडगे यांनी केले. उपसरपंच अमित पवार यांनी आभार मानले.