वाल्हे, ता.२ : वाल्हे (ता.पुरंदर) परिसरात शेतकऱ्यांनी संदेशाच्या माध्यमातून सरकारचे लक्ष वेधण्याचा प्रयत्न केला. गायकवाडवाडी येथील सुहास पवार या तरुण शेतकऱ्याने
गुंजवणीचे पाणी शेतीला मिळाले पाहिजे यासाठी सजावटीतून बैलांच्या पाठीवर ‘गुंजवणीचे धरणाचे पाणी मिळालेच पाहिजे’ तसेच ‘बा सरकारा वाचव माझ्या
धन्याला’ लिहून गुंजवणी धरण लाभक्षेत्रातील सोळा गावांना जुन्या सर्वेनुसार पाणी मिळावे व शेतकरी वाचवावा याबाबत सरकारचे लक्ष वेधण्याचा प्रयत्न केला.
बहुतांश शेतकऱ्यांनी सर्जा-राजाची वाजत-गाजत मिरवणुक न काढता घरीच सर्जा-राजाची पूजा करून कृतज्ञता व्यक्त केल्याचे सुहास पवार यांनी सांगितले.
पुरंदर तालुक्यातील वाल्हे, आडाचीवाडी, सुकलवाडी, वागदरवाडी, दौंडज, पिंगोरी आदि परिसरामध्ये पारंपारिक पद्धतीने लाडक्या सर्जा-राजाचा
भाद्रपद बैलपोळा मोठ्या उत्साहात साजरा करण्यात आला. . शेतकऱ्यांमध्ये उत्साह नसला तरी बहुतांश शेतकऱ्यांनी बैलांना पुरणपोळीचा नैवेद्य भरवून
बैलांबाबत कृतज्ञता व्यक्त केली.