वाल्हे, ता. ८ : सुकलवाडी (ता.पुरंदर) परिसरात वनविभागाचे क्षेत्र आहे. त्या भागात विविध सामाजिक व पर्यावरणपूरक उपक्रम राबवावेत, अशी
मागणी सुकलवाडी ग्रामपंचायतीच्या वतीने सरपंच संदेश पवार यांनी वनविभागाकडे करण्यात आली होती. या मागणीची दखल घेत वनविभागाचे सासवड
वनपरिक्षेत्र अधिकारी सागर ढोले यांनी मंगळवारी (ता. ५) सुकलवाडी परिसरात शिवारफेरी करत वनक्षेत्राची पाहणी केली.
यावेळी ढोले यांनी ग्रामपंचायत पदाधिकारी व ग्रामस्थांसह परिसरातील भोलाई माता मंदिर परिसराचा प्रत्यक्ष भेट देऊन विशेष आढावा घेतला. या मंदिरामध्ये दरवर्षी हजारो भाविक दर्शनासाठी या ठिकाणी येत असल्याने, मंदिर परिसरात देवस्थान निसर्ग पर्यटन योजना अंतर्गत वृक्षारोपण, पर्यटकांसाठी सोयीसुविधा आणि इतर पर्यावरणपूरक उपक्रम राबण्याबाबतचे निवेदन सुकलवाडीचे सरपंच संदेश पवार यांनी वनअधिकाऱ्यांना दिले. याप्रसंगी माजी उपसरपंच धनंजय पवार, सामाजिक कार्यकर्ते धनंजय परशुराम पवार, सुनील भोसले, अजित पवार, सुभाष पवार, राजेंद्र चव्हाण, केशव पवार, दत्तात्रेय पवार, वनमजूर हनुमंत पवार, किरण पवार, प्रेम दाते, शरद चव्हाण, जयवंत पवार, शुभम चव्हाण आदींसह ग्रामस्थ
उपस्थित होते.